Iesu, to ˈna oraraa e ta ˈna taviniraa

Te titau ra Iesu ia Mataio ia pee mai ia ˈna

I MURI noa ˈˈe i to ˈna faaoraraa i te hoê hapepa, ua faarue maira Iesu ia Kaperenaumi no te haere atu na te hiti o te miti o Galilea. I reira, ua haere faahou maira te mau taata e rave rahi ia ˈna ra, e ua haapii atura oia ia ratou. E te haere maira Iesu mai reira mai, te ite ra oia i te hoê taata o Mataio te iˈoa, e parau-atoa-hia o Levi, te parahi ra i te fare aufauraa taoˈa. E inaha, ua parau atura oia ia ˈna e: “A pee mai ia ˈu.”

Eita e ore e ua ite maitai o Mataio i te mau haapiiraa a Iesu, mai ia Petero, Anederea, Iakobo e o Ioane a titau atu ai o Iesu ia ratou ia pee mai ia ˈna. E mai ia ratou ra, ua farii oioi atura Mataio i te titauraa i pûpûhia mai ia ˈna. E tia mai oia e faarue atura i ta ˈna mau hopoia telona ra e ua pee atura ia Iesu.

I muri aˈe, peneiaˈe no te faatupu i te titauraa i pûpûhia mai ia ˈna, ua faaineine aˈera o Mataio i te tahi oroa rahi i roto i to ˈna fare. Taa ê atu ia Iesu e i ta ˈna mau pǐpǐ, e rave rahi mau hoa tahito to Mataio tei tae mai. I te paeau rahi, eita roa ˈtu te mau ati Iuda e au mai ia ratou, i te mea hoi e e titau na ratou i te tute na te mau tia mana roma hae-roa-hia e to Iseraela. Hau atu, e pinepine ratou i te eiâ na roto i te titauraa ˈtu i te nunaa hau aˈe i ta te tute i faataa.

Ia ite atu ratou e tei te oroa atoa o Iesu i pihai iho i taua mau huru taata nei, ua ani atura te mau Pharisea i ta ˈna mau pǐpǐ: “Eaha i amu atoa ˈi ta outou orometua i te mau telona e te feia hara?” Ite aˈera râ Iesu, e ua parau maira ia ratou e: “E ere to te feia ora te tahuˈa, no te feia maˈi râ. E tena na, a haere, a haapii i te auraa i te maa parau ra e, o te aroha ta ˈu hinaaro, eiaha te tusia; aore hoi au i haere mai e parau i te feia parau-tia i te feia hara râ ia tatarahapa.”

Mea papu maitai e ua titau o Mataio i taua mau telona ra i to ˈna fare ia nehenehe ratou ia faaroo mai ia Iesu e ia faaorahia i te pae varua. Ua amui maira ïa o Iesu ia ratou no te tauturu ia ratou ia taai i te mau auraa maitai e te Atua. Aita o ˈna i faaino atu ia ratou, mai te mau Pharisea e titau noa ra i ta ratou iho parau-tia. Ma te aroha mau, ua riro aˈera oia mai te hoê taote i te pae varua no ratou.

Mai te peu e ua faaite Iesu i to ˈna aroha i nia i te feia hara, e ere ïa te auraa e te tapo ra o ˈna i to ˈna mata i nia i ta ratou mau hara, hoê â râ manaˈo to ˈna no ratou e no te feia tei maˈihia i te pae tino. Ia haamanaˈo na outou ei hiˈoraa e, i te hoê mahana, ua toro atura oia i to ˈna rima i te hoê lepera e ua tapea ˈtura ia ˈna i te na ôraa ˈtu e: “Ua tia ia ˈu, ia mâ oe.” Mai ia ˈna, ia faaite atoa na tatou i te aroha e te here na roto i te tautururaa i te feia e hinaaro mau ra, i te pae varua iho â râ! Mataio 8:3; 9:9-13; Mareko 2:13-17; Luka 5:27-32.

◆ I hea roa to Iesu iteraa ˈtu ia Mataio?

◆ Eaha te toroa o Mataio, e no te aha te mau ati Iuda i ore ai i au i te feia te reira to ratou toroa?

◆ Eaha te faahaparaa i faahapahia ˈtu ia Iesu, e eaha ta ˈna i pahono atu?

◆ No te aha Iesu i amui atu ai i roto i te feia hara?

[Hohoˈa api taatoa i te api 19]