HAAPIIRAA 2

Te huru paraparau

Korinetia 2, 2:17

TE FA: A paraparau mai ta oe e rave ra i te mau mahana atoa e ma te haavare ore. Ia papu i te taata eaha to oe manaˈo no nia i te tumu parau e no nia ia ratou.

TE TITAUHIA IA RAVE:

A pure e a faaineine maite. A pure ia tiatonu to oe feruriraa i nia i te poroi, eiaha râ i nia ia oe iho. Ia haamanaˈo atoa oe i te mau manaˈo faufaa e titauhia ia faaite. A faataa na roto i ta oe iho mau parau, eiaha râ ma te taio noa i tei papaihia.

Ia opua oe e taio i te hoê irava Bibilia aore ra i te tahi atu papai, a faaineine maite ia oe ia hee noa te taioraa. Mai te peu e faahiti oe i te parau a te tahi taata, a taio mai te huru ra o oe iho te taata e paraparau ra no te haamatara i to ˈna mau manaˈo horuhoru. Eiaha râ e faarahi roa.
A paraparau ma te haavare ore. A haamanaˈo noa i te faufaaraa ia faaite i te poroi o te Faatereraa arii i te taata. E faaite ïa to oe huru, ta oe aparaa rima, e to oe hohoˈa mata te tâuˈa mau ra oe i te taata.

A haapao maitai i te mau parau ta oe e faahiti. Mea tura ta tatou poroi, a maiti ïa i te mau parau maramarama maitai e a ara i ta oe huru paraparau.
A hiˈo i te taata. Mai te peu e e ere i te mea huru ê, a hiˈo i te taata a paraparau ai oe. Ia horoa oe i te hoê oreroraa parau, ia vai to oe mata maa taime iti i nia i te hoê taata, eiaha râ i nia i te taatoaraa.