Ua tonohia o Paulo i Roma

Ua hope te toruraa o to Paulo tere pororaa i Ierusalema. Ua tapeahia oia e ua hurihia oia i roto i te fare tapearaa. I tera po, maoti te hoê orama, ua parau Iesu ia ˈna: ‘E haere oe i Roma e e poro oe i ǒ.’ Ua afaihia ïa o Paulo i Kaisarea mai Ierusalema mai, i reira oia i tapeahia ˈi e piti matahiti i te maoro. I to ˈna haavaraa i mua i te tavana Fesito, ua parau o Paulo: ‘Ia haavahia vau e Kaisara i Roma.’ Ua pahono atura o Fesito: “Na Kaisara e haava ia oe, ia Kaisara ïa oe e haere ai.” Ua haere o Paulo i Roma na nia i te hoê pahi e ua apitihia oia e na taeae Kerisetiano, o Luka raua Arisetareho.

A tere ai na nia i te pahi, ua tupu te hoê vero puai e rave rahi mahana i te maoro. Ua manaˈo te mau taata e e pohe ratou. Ua parau râ o Paulo: ‘E homa, ua parau mai te hoê melahi na roto i te hoê moemoeâ: “Eiaha e mǎtaˈu Paulo. E tae iho â oe i Roma e e faaorahia te feia atoa tei roto i teie pahi.” Ia itoito outou! Eita tatou e pohe.’

Ua tupu te vero 14 mahana i te maoro. I te pae hopea, ua itehia te fenua o Melita. Ua mau e ua parari te pahi. Ua tae râ na 276 taata tei roto i te pahi i te pae tahatai e ua ora mai ratou. Ua ˈau vetahi, ua tapea te tahi atu i te mau huˈahuˈa o te pahi tei parari e ua tae ratou i te pae tahatai. Ua haapao te feia no Melita ia ratou e ua tahu ratou i te hoê auahi ia mahanahana ratou.

E toru avaˈe i muri iho, ua afai te mau faehau ia Paulo i Roma na nia i te tahi atu pahi. I to Paulo taeraa ˈtu i ǒ, ua haere te mau taeae e farerei ia ˈna. A ite ai ia ratou, ua haamauruuru o Paulo ia Iehova e ua itoitohia oia. Noa ˈtu e ua tapeahia o Paulo, ua nehenehe oia e ora i roto i te hoê fare tarahu e na te hoê faehau i tiai ia ˈna. Ua faaea oia i ǒ e piti matahiti i te maoro. Ua haere atu te mau taata e farerei ia ˈna e ua poro oia ia ratou no nia i te Faatereraa arii a te Atua e no nia ia Iesu. Ua papai atoa o Paulo i te mau rata na te mau amuiraa i Asia Iti e i Iudea. Ua faaohipa iho â Iehova ia Paulo no te faaite i te parau apî oaoa i te mau nunaa atoa.