Ua maiti o Iesu ia Saulo

E taata no Roma o Saulo e ua fanauhia oia i Tareso. E Pharisea oia e mea ite roa oia i te ture ati Iuda. Mea hae roa na ˈna te mau Kerisetiano. Ua haru oia i te mau tane e vahine tei to ratou iho fare no te huri atu i roto i te fare tapearaa. Ua tia atoa oia no te mataitai i te hoê pûpû taata iria tei haapohe ia Setephano ma te pehi atu i te ofai.

No Saulo râ, aita i navai ia tapeahia te mau Kerisetiano i Ierusalema noa. Ua ani atura oia i te tahuˈa rahi ia tono ia ˈna i te oire o Damaseko no te aˈuaˈu i te mau Kerisetiano i ǒ. A piri ai o Saulo i te oire, ua anaana taue mai te hoê maramarama puai e ati aˈe ia ˈna e ua topa oia i raro. Ua faaroo oia i te hoê reo tei parau: ‘Saulo, no te aha oe e hamani ino ai ia ˈu?’ Ua ani atura o Saulo: ‘O vai oe?’ Teie te pahonoraa: ‘O vau o Iesu. A haere i Damaseko e e haapii mai oe eaha te mea tia ia rave.’ Ua riro atura o Saulo ei taata matapo e ua titauhia ia aratai rima ia ˈna e tae roa ˈtu i te oire.

I Damaseko, i vai na te hoê Kerisetiano taiva ore, o Anania to ˈna iˈoa. Maoti te hoê orama, ua parau Iesu ia ˈna: ‘A haere i te fare o Iuda i te aroâ parauhia Afaro e a imi ia Saulo.’ Ua na ô atura Anania: ‘E te Fatu e, ua ite au o vai tera taata! Te huri nei oia i ta oe mau pǐpǐ i roto i te fare tapearaa!’ Ua parau râ o Iesu: ‘A haere e farerei ia ˈna. Ua maiti au ia Saulo no te poro i te parau apî oaoa i e rave rahi nunaa.’

Ua imi atura o Anania ia Saulo e ua parau oia ia ˈna: ‘Saulo, to ˈu taeae, ua tono Iesu ia ˈu ia ite faahou oe.’ I taua iho â taime ra, ua ite faahou o Saulo. Ua haapii mai oia no nia ia Iesu e ua riro atura oia ei pǐpǐ na ˈna. Ua bapetizohia o Saulo ei Kerisetiano e ua haamata oia i te poro i te mau sunago e ta ˈna mau hoa Kerisetiano. A feruri na i te ati Iuda tei huru ê roa a ite ai ia Saulo i te poro i te mau taata no nia ia Iesu. Ua parau ratou: ‘E ere anei tera taata tei matau i te aˈuaˈu i te mau pǐpǐ a Iesu?’

E toru matahiti i te maoro, ua poro o Saulo i te mau taata i Damaseko. Ua riri roa te ati Iuda ia Saulo e ua opua ratou i te haapohe ia ˈna. Ua faarooroo râ te mau taeae no nia i tera opuaraa ino e ua tauturu ratou ia ˈna ia horo ê. Ua tuu ratou ia ˈna i roto i te hoê farii e ua haapou ratou ia ˈna na roto i te hoê apoo o te patu o te oire.

Ua haere atura o Saulo i Ierusalema e ua tamata oia i te amui e te mau taeae i ǒ. Ua riaria roa râ ratou ia ˈna. Na te hoê pǐpǐ mǎrû, o Baranaba to ˈna iˈoa, i afai ia Saulo i te mau aposetolo e i haapapu atu e ua taui iho â o Saulo. Ua haamata o Saulo i te poro i te parau apî oaoa e te amuiraa i Ierusalema ma te itoito rahi. I muri iho, ua piihia oia o Paulo.