Ua faatiahia mai o Iesu

I muri aˈe i to Iesu poheraa, ua haere te hoê taata moni, o Iosepha to ˈna iˈoa, e farerei ia Pilato ia faatia mai ia ˈna ia rave i to Iesu tino pohe i nia i te pou. Ua vehî atura Iosepha i te tino i te ahu lino maitai e te raau noˈanoˈa e ua tuu ihora i roto i te hoê menema apî. E ofai teiaha mau i te tomoraa o te menema. Ua parau te mau tahuˈa tiaau ia Pilato: ‘Manaˈo anaˈe matou e haere mai vetahi o ta Iesu mau pǐpǐ e rave i to ˈna tino no te parau e ua faatiahia mai oia.’ Ua parau atura o Pilato ia ratou: ‘A tapiri maitai i te menema i te ofai e a tuu atu i te tiai.’

E toru mahana i muri iho, i te poipoi roa, ua haere vetahi mau vahine i te menema e ua ite ratou e ua turaihia te ofai ia matara mai te tomoraa. I roto i te menema, ua parau te hoê melahi i te mau vahine: ‘Eiaha e mǎtaˈu. Ua faatiahia mai o Iesu. A haere e a faaite i ta ˈna mau pǐpǐ ia farerei ia ˈna i Galilea.’

Oioi o Maria Magadala i te imi ia Petero raua Ioane. Ua parau atura oia ia raua: ‘Ua hopoi-ê-hia to Iesu tino!’ Ua horo ihora o Petero raua Ioane i te menema. A ite ai e aita faahou e taata i roto i te menema, ua hoˈi raua i to raua fare.

I to Maria hoˈiraa ˈtu i te menema, ua ite oia i na melahi e piti i roto i te menema e ua parau oia ia raua: ‘Aita vau i ite ihea to ta ˈu Fatu tino i te tuuraahia.’ I muri iho, ua ite oia i te hoê tane. Ua manaˈo o Maria e o te taata tamâ aua tera tane. Ua parau atura oia ia ˈna: ‘Faaite mai na ihea to oe tuuraa ia ˈna.’ Ua na ô râ te tane: “Maria!” Ite atura o Maria e o Iesu tera tane. Ua tuô oia: “Orometua!” e ua tauahi oia ia ˈna. Ua parau atura o Iesu ia ˈna: ‘A haere e faaite i to ˈu mau taeae e ua ite oe ia ˈu.’ Ua horo aˈera o Maria i te mau pǐpǐ ra e ua faaite atu e ua ite oia ia Iesu.

Tau taime i muri iho, i taua noâ mahana, ua haere e piti pǐpǐ na nia i te purumu mai Ierusalema e tae atu i Emausa. Ua apiti ihora te hoê taata ia raua i nia i te purumu e ua ani oia eaha ta raua paraparauraa. Ua pahono atura raua: ‘Aita oe i faarooroo aˈenei? E toru mahana i mairi, ua haapohe te mau tahuˈa tiaau ia Iesu. I teie nei, te parau ra vetahi mau vahine e ua ite ratou ia ˈna e te ora noa ra oia.’ Ua ani atura te taata: ‘Te tiaturi ra anei orua i te mau peropheta? Ua tohu ratou e e pohe te Mesia e i muri iho e faatiahia mai oia.’ Ua tamau oia i te faataa ˈtu i te mau irava Bibilia. I to ratou taeraa ˈtu i Emausa, ua ani te mau pǐpǐ i tera taata ia apiti ia raua. I te hora tamaaraa i te po, i muri aˈe i to tera taata pureraa no te pane, ua taa ia raua e o Iesu oia. E ua moˈe ihora o Iesu.

Oioi taua na pǐpǐ ra i te haere i Ierusalema i te vahi e putuputu ai te mau aposetolo. Ua faatia raua i tei tupu. Tei ǒ noa â ratou i roto i te fare e ua fa mai nei o Iesu ia ratou pauroa. I te omuaraa, aita te mau aposetolo i nehenehe e tiaturi e o Iesu iho â tera taata. Ua parau atura oia: ‘A hiˈo na i to ˈu na rima. A fafa mai. Ua papaihia e faatiahia mai te Mesia, mai te pohe mai.’