Te mau patu o Ierusalema

I te tau o Ezera, i ora na te hoê tavini a te arii Aretehasaseta, o Nehemia to ˈna iˈoa. E taata Iseraela oia o tei ora i Susana, te hoê oire Peresia. Ua tae mai to Nehemia taeae, mai te oire o Iuda ra, e ua faatae oia i teie poroi peapea mau: ‘Mea atâta mau no te nunaa tei hoˈi i Ierusalema. Aita te mau patu o te oire e te mau uputa ta to Babulonia i tuparari i patu-faahou-hia.’ Ua huru ê roa o Nehemia. Ua hinaaro oia e haere i Ierusalema no te tauturu atu. Ua pure atura oia i te Atua ia nehenehe te arii e faatia ia ˈna ia haere atu.

I muri iho, ua ite te arii e ua mauiui o Nehemia. Ua parau oia: ‘A tahi ra vau i ite ai ia oe mai tera. Eaha te fifi?’ Ua pahono Nehemia: ‘Ua mauiui vau no te mea aita to ˈu oire o Ierusalema i patu-faahou-hia.’ Ua ani atura te arii: ‘Eaha ta oe e hinaaro ia rave au?’ Oioi Nehemia i te pure i roto i to ˈna aau. Ua parau atura oia: ‘A vaiiho na ia haere au i Ierusalema no te patu faahou i te mau patu.’ Ua faatia te arii Aretehasaseta ia haere Nehemia i ǒ e ua rave te arii i te mau faanahoraa ia nehenehe to ˈna tere e tupu maitai. Ua faariro atoa te arii ia Nehemia ei tavana i Iuda e ua horoa ˈtu i te mau raau no te mau uputa o te oire.

I to Nehemia taeraa ˈtu i Ierusalema, ua hiˈopoa oia i te mau patu o te oire. I muri iho, ua haaputuputu oia i te mau tahuˈa e te mau taata faatere a na ô atu ai: ‘Mea fifi mau te tupuraa. E mea titauhia ia haa tatou.’ Ua farii te nunaa i te reira e ua haamata ratou i te patu faahou i te mau patu.

Ua faaooo râ vetahi o te mau enemi o Iseraela e ua parau ratou: ‘E nehenehe te hoê alope e haamarua i ta outou patu.’ Aita râ te feia rave ohipa i tâuˈa aˈe i ta ratou mau parau e ua tamau ratou i te ohipa paturaa. Mea teitei e mea paari aˈe te patu i teie nei.

Ua faaoti atura te mau enemi ia haere i te mau vahi atoa i Ierusalema no te aro huna i te nunaa. Ua ite te ati Iuda i ta ratou opuaraa e ua riaria roa ratou. Ua parau râ Nehemia: ‘Eiaha e mǎtaˈu. E tauturu mai Iehova ia tatou.’ Ua maiti oia i te mau taata tiai no te paruru i te feia rave ohipa. Aita ïa te mau enemi i nehenehe e aro ia ratou.

Ua titauhia e 52 noa mahana no te faahope roa i te mau patu e te mau uputa. Ua parau Nehemia i te ati Levi atoa i Ierusalema ia faatupu i te avariraa. Ua tatuhaa oia ia ratou na roto e piti pǔpǔ himene. Ua pauma ratou i nia i te patu ma te faaohipa i te mau taahiraa i te Uputa o te pape pihaa ra. I muri iho, ua haere na pǔpǔ himene e piti i to ratou pae no te haaati i te oire. Ua faataˈi ratou i te pu, ua faaohipa ratou i te mau sumebalo e kinura e ua himene ratou no Iehova. Ua apiti o Ezera i te hoê pǔpǔ e ua apiti o Nehemia i te tahi atu pǔpǔ no te tapae i te hiero. Ua pûpû te mau taata atoa, oia hoi te mau tane, vahine e tamarii, i te mau tusia na Iehova e ua faatupu ratou pauroa i tera oroa avariraa. Ua himene ratou ma te puai e te oaoa e ua faaroohia to ratou reo i te vahi atea.