Aita ratou i tipapa noa ˈˈe

Tau taime i muri aˈe i te moemoeâ a te arii Nebukanesa no nia i te tii, ua hamani oia i te hoê idolo auro rahi roa. Ua faatia oia i te reira i te vahi papu o Dura. Ua haaputuputu te arii i te mau taata o te fenua e tiaraa teitei roa ˈˈe to ratou, mai ia Sadaraka, Meseka e Abedenego. Ua ani te arii ia ratou ia tia i mua i te idolo. Ua faaue te arii ia ratou pauroa: ‘A faaroo ai outou i te taˈi o te pu, te kinura e te sumephonia, a tipapa i mua i te tii! Te taata o te ore e tipapa i mua i te tii, e taorahia ïa oia i roto i te umu auahi ura ra.’ E tipapa anei na taurearea Hebera e toru i mua i te tii aore ra e haamori anei ratou ia Iehova anaˈe?

I muri iho, ua faaue te arii ia faataˈihia te upaupa. Ua tipapa te mau taata atoa i mua i te tii e ua haamori ratou i te reira, eiaha râ o Sadaraka, Meseka e o Abedenego. Ua ite te tahi mau taata i te reira e ua faaite atu ratou i te arii: ‘Aita na taurearea Hebera e toru e hinaaro ra e haamori i te tii ta oe i faatia.’ Ua ani Nebukanesa ia afaihia mai ratou e ua na ô oia: ‘E tapiti faahou tatou ia nehenehe outou e haamori i te tii. Ia ore outou e na reira, e taora vau ia outou i roto i te umu auahi. Aita hoê aˈe atua o te nehenehe e faaora ia outou i to ˈu nei rima.’ Ua pahono ratou: ‘Aita e faufaa ia tapiti faahou. E faaora iho â to matou Atua ia matou. E ia ore noa ˈtu oia e faaora mai, e te arii e, eita roa ˈtu matou e haamori i te tii.’

Ua riri roa Nebukanesa. Ua parau oia i ta ˈna mau tavini: ‘Ia faaâhuhia te umu auahi e hitu taime hau aˈe i tei matauhia!’ I muri iho, ua faaue te arii i ta ˈna mau faehau: ‘A taamu i teie mau taata e a taora ia ratou i roto i te umu auahi!’ No te âhu rahi o te umu, ua pohe aˈera te mau faehau tei taora i na taurearea Hebera e toru i roto i te auahi. Tera râ, a hiˈo ai Nebukanesa i roto i te umu auahi, ua ite oia e maha taata te hahaere ra i roto i te auahi. E ere faahou e toru taata. Ua riaria roa oia e ua ani oia i to ˈna mau tia mana: ‘E ere anei e toru taata ta tatou i taora i roto i te auahi? E maha taata ta ˈu e ite ra e e au hoê o ratou i te melahi!’

Ua haere atura Nebukanesa i pihai iho i te umu auahi e ua tuô oia: ‘A haere mai i rapae, e te mau tavini a te Atua Teitei Roa ˈˈe!’ Ua maere mau te mau taata atoa i te iteraa ia Sadaraka, Meseka e ia Abedenego e haere mai i rapae i te auahi. Aita roa to ratou tino, iri, rouru e ahu i paapaa i te auahi e aita roa ˈtu te hauˈa auahi i mau i nia ia ratou.

Ua na ô o Nebukanesa: ‘Mea teitei roa te Atua o Sadaraka, Meseka e o Abedenego. Ua tono oia i ta ˈna melahi e ua faaora oia ia ratou. Aita hoê aˈe atua mai to ratou Atua.’

Mai teie na taurearea Hebera e toru, ua faaoti papu anei oe e vai taiva ore noa ia Iehova noa ˈtu te tupuraa?