Ua haamouhia Ierusalema

Ua tamau noa te nunaa o Iuda i te faarue ia Iehova e i te haamori i te mau atua hape. E rave rahi matahiti i te maoro, ua tamau noa Iehova i te tauturu ia ratou. Ua tono oia i te mau peropheta no te faaara i te nunaa, aita râ ratou i faaroo atu. Ua faaooo ratou i te mau peropheta. E nafea Iehova i faaore ai i ta ratou haamoriraa idolo?

Ua aro te arii o Babulonia, o Nebukanesa to ˈna iˈoa, i tera e tera nunaa. I te taime matamua i aro ai oia ia Ierusalema, ua haru Nebukanesa i te arii Iehoiakina, i te hui arii, i te mau faehau e i te feia rimaî. Ua afai oia ia ratou pauroa i Babulonia. Ua rave atoa oia i te mau taoˈa atoa o te hiero o Iehova. I muri aˈe, ua faatoroa Nebukanesa ia Zedekia ei arii no Iuda.

I te omuaraa, ua faaroo Zedekia ia Nebukanesa. Ua ani râ te mau nunaa tapiri e te mau peropheta haavare ia Zedekia ia orure hau i to Babulonia. Ua faaara Ieremia ia Zedekia: ‘Mai te peu e e orure hau oe, e itehia ïa te ohipa taparahiraa taata, te oˈe e te maˈi i Iuda.’

I te vaˈuraa o te matahiti o to ˈna ariiraa, ua faaoti Zedekia e orure hau i to Babulonia. Ua ani oia i te tauturu a te nuu Aiphiti. I muri aˈe, ua tono Nebukanesa i ta ˈna nuu no te aro ia Ierusalema e ua puhapa ratou i rapae i te oire. Ua faaite Ieremia ia Zedekia: ‘Ua parau Iehova e mai te peu e e auraro oe i to Babulonia, e ora mai oe, oia atoa te nunaa. Mai te peu râ e eita oe e na reira, e tutui to Babulonia ia Ierusalema i te auahi e e tuu ratou ia oe i te fare tapearaa.’ Ua pahono atu Zedekia ma te parau e: ‘Eita vau e auraro atu!’

Hoê matahiti e te afa i muri aˈe, ua faaapoo te nuu Babulonia i te patu o te oire o Ierusalema no te tomo atu. Ua tutui te nuu i te oire o Ierusalema i te auahi. Ua tutui atoa ratou i te hiero e ua haapohe ratou e rave rahi taata. Ua rave te nuu Babulonia e tausani taata no te tuu ia ratou i te fare tapearaa.

Ua horo ê o Zedekia ia Ierusalema. Ua aˈuaˈu râ to Babulonia ia ˈna. Ua haru ratou ia ˈna i pihai iho i te oire o Ieriko e ua afai ratou ia ˈna i mua ia Nebukanesa. Ua faahepo te arii o Babulonia ia Zedekia ia hiˈo i ta ˈna iho mau tamaiti ia haapohehia. I muri iho, ua haamatapo Nebukanesa ia Zedekia e ua tuu oia ia ˈna i te fare tapearaa. I reira Zedekia i pohe ai i muri iho. Ua fafau râ Iehova i te nunaa o Iuda: ‘Ua hope anaˈe e 70 matahiti, e faahoˈi au ia outou i Ierusalema.’

Eaha te tupu no te feia apî tei tapeahia i Babulonia? E vai taiva ore anei ratou ia Iehova?