Te hoê faatereraa arii tatuhaahia

A haamori ai Solomona ia Iehova, ua vai hau noa to Iseraela. Ua faaipoipo râ o Solomona e rave rahi vahine no te mau fenua ê e ua haamori tera mau vahine i te mau idolo. Ua taui mǎrû mai Solomona i to ˈna huru e ua haamata atoa oia i te haamori i te mau idolo. Ua riri roa o Iehova. Ua parau oia ia Solomona: ‘E haruhia Iseraela i te rima o to oe utuafare e e tatuhaahia te reira na roto e piti tuhaa. E horoa ˈtu vau i te tuhaa rahi aˈe i te hoê o ta oe mau tavini e e faatere to oe utuafare i nia i te tuhaa iti aˈe.’

Ua haapapu atu â Iehova i to ˈna faaotiraa ma te tahi atu ravea. I tere na hoê o ta Solomona mau tavini, o Ieroboama to ˈna iˈoa, a farerei ai oia i te peropheta, o Ahia. Ua tumutu Ahia i to ˈna iho ahu na roto 12 tuhaa e ua parau oia ia Ieroboama: ‘E haru Iehova i te faatereraa arii o Iseraela i te rima o te utuafare o Solomona e e tatuhaa oia i te reira na roto e piti tuhaa. A rave i teie na ahuru tuhaa no te mea o oe te faatere i nia i na ahuru opu.’ Ua ite te arii Solomona i te reira e ua hinaaro oia e haapohe ia Ieroboama! Ua horo ê atu Ieroboama i Aiphiti. I muri iho, ua pohe o Solomona e ua riro ta ˈna tamaiti, o Rehoboama to ˈna iˈoa, ei arii. No Ieroboama, e ere i te mea atâta faahou ia hoˈi i Iseraela.

Ua parau te mau matahiapo o Iseraela ia Rehoboama: ‘Ia ohipa maitai oe i nia i te nunaa, e vai taiva ore te nunaa ia oe.’ Ua parau râ te mau hoa apî aˈe o Rehoboama: ‘E titauhia ia vai etaeta oe i nia i te nunaa! Ia ohipa rahi atu â ratou!’ Ua pee Rehoboama i te aˈoraa o to ˈna mau hoa apî aˈe. Ua rave ino oia i te nunaa e ua orure hau mai te nunaa. Ua faariro ratou ia Ieroboama ei arii i nia i na opu ahuru. O na opu ahuru te faatereraa arii o Iseraela. Ua riro te tahi atu na opu e piti ei faatereraa arii o Iuda e ua vai taiva ore tera nunaa ia Rehoboama. Ua tatuhaahia ïa na opu 12 i teie nei.

Aita Ieroboama i hinaaro ia haere to ˈna nunaa e haamori i te Atua i Ierusalema, i reira hoi te faatereraa a Rehoboama. Ua ite anei oe no te aha? Ua riaria Ieroboama ia faarue te nunaa ia ˈna e ia turu ratou ia Rehoboama. Ua hamani ïa oia e piti fanauˈa puaatoro auro e ua parau oia i te nunaa: ‘Mea atea roa Ierusalema. E nehenehe outou e haamori i te Atua i ǒ nei.’ Ua haamata te nunaa i te haamori i na fanauˈa puaatoro auro e ua moˈe faahou ia ratou o Iehova.