Ua orure hau ratou ia Iehova

I muri iti aˈe, tei te medebara ïa to Iseraela, ua orure hau mai Kora, Datana, Abirama e te tahi atu na taata e 250 ia Mose e ia Aarona. Ua parau ratou ia raua: ‘Ua fiu roa matou ia orua! No te aha o oe to matou aratai e o Aarona te tahuˈa rahi? Tei ia tatou pauroa o Iehova, eiaha ia oe noa e ia Aarona.’ Aita Iehova i au i te reira. No ˈna, e au ra e te orure hau ra tera mau taata ia ˈna!

Ua parau Mose ia Kora e i te feia i turu ia ˈna: ‘A haere mai i te sekene ananahi e a afai mai i ta outou farii auahi faaîhia e te mea noˈanoˈa. E faaite mai Iehova o vai ta ˈna i maiti.’

I te mahana i muri iho, ua haere Kora e na taata e 250 e farerei ia Mose i te sekene. I tera vahi, ua tutui ratou i te mea noˈanoˈa mai te huru ra e e tahuˈa ratou. Parau atura Iehova ia Mose raua Aarona: ‘Ia faataa ê orua ia Kora, oia atoa i ta ˈna mau taata.’

Noa ˈtu ua haere Kora ia Mose ra i te sekene, ua patoi Datana, Abirama e to raua utuafare i te haere atu. Ua parau Iehova i to Iseraela ia haere ê i te mau tiahapa o Kora, Datana e Abirama. Oioi te mau Iseraela i te na reira. Ua vai Datana, Abirama e to raua utuafare i rapaeau i to ratou mau tiahapa. I muri iho, ua amaha taue te fenua e ua topa ratou i roto i tera apoo a pohe atu ai! I te sekene, ua topa mai te hoê auahi mai te raˈi mai i nia ia Kora e i nia i na taata e 250 e ua pohe ratou.

Ua parau ihora Iehova ia Mose: ‘A rave i te hoê raau no ô mai i te taata aratai o te opu taitahi e a papai i to ˈna iˈoa i nia i tera raau. I nia râ i te raau a te ati Levi, a papai i te iˈoa o Aarona. A tuu i taua mau raau ra i roto i te sekene. E uaa mai te tiare i nia i te raau a te taata ta ˈu e maiti.’

Te mahana i muri iho, ua afai Mose i te mau raau atoa no te faaite atu i te feia aratai. I nia i ta Aarona raau, ua itehia te tiare tei tupu mai e te aramona paari. Maoti teie ravea, ua haapapu Iehova e ua maiti oia ia Aarona ei tahuˈa rahi.