Te hoê euhe ia Iehova

Piti avaˈe i muri aˈe i to ratou faarueraa ia Aiphiti, ua tapae te mau Iseraela i te mouˈa Sinai e ua faatia ratou i te puhapa. Ua pii atura Iehova ia Mose, o tei haere i nia i te mouˈa, e ua na ô atura oia: ‘Ua faaora vau i te mau Iseraela. Ia faaroo ratou ia ˈu e ia pee ratou i ta ˈu mau faaueraa, e riro ratou ei nunaa taa ê no ˈu.’ Hoˈi atura Mose i to Iseraela ra no te faaite atu eaha ta Iehova i parau. Eaha ta ratou i pahono atu? Ua parau ratou: ‘E rave matou i te mau mea atoa ta Iehova e faaue mai.’

Ua haere faahou Mose i nia i te mouˈa. I reira Iehova i parau ai: ‘E toru mahana i muri iho, e paraparau vau ia oe. A faaara i te nunaa ia ore ratou e tamata i te haere i nia i te mouˈa Sinai.’ Pou atura Mose mai nia mai i te mouˈa e parau atura oia i to Iseraela ia vai ineine no te faaroo i te reo o Iehova.

oru mahana i muri iho, ua ite te mau Iseraela i te anaparaa uira e i te hoê ata poiri i nia i te mouˈa. Ua faaroo atoa ratou i te haruru puai o te patiri e i te taˈi o te hoê pu. I muri iho, pou maira Iehova i nia i te mouˈa na roto i te auahi. Ua riaria roa te mau Iseraela e ua rûrû ratou. Ua aueue te mouˈa e ua tapoˈi roa te au auahi i te mouˈa. Puai noa ˈtura te taˈi o te pu. Parau atura te Atua: ‘O vau o Iehova. Eiaha roa ˈtu outou e haamori i te tahi atu mau atua.’

Ua haere faahou Mose i nia i te mouˈa. Horoa ˈtura Iehova i ta ˈna mau ture ia nehenehe te nunaa e ite e nafea ia haamori ia ˈna e ia faaohipa i ta ˈna mau ture. Papai atura Mose i te mau ture e taio atura i te reira i te mau Iseraela. Euhe atura ratou: ‘E rave matou i te mau mea atoa ta Iehova e faaue mai.’ Parau mau, ua euhe ratou i te Atua. E tapea anei râ ratou i te reira?