UIRAA 7
Eaha te rave ia onoono mai to ˈu hoa ia taoto ia ˈna?
EAHA TA OE E RAVE?
Feruri na i teie tupuraa: A piti noa avaˈe Hina i te matauraa ia Manu. No Hina râ, e au ra e mea maoro raua i te matauraa. Afaifai noa raua i te poroi vini, e paraparau ehia hora i nia i te niuniu e e faaoti atoa raua i to te tahi e te tahi mau parau! I teie nei râ, aita i navai no Manu.
I na piti avaˈe i mairi, aita e ohipa ê atu ta raua i rave i te tapearaa i to raua rima e te apâ-poto-raa ia raua. Tera noa ta Hina e hinaaro aita ˈtu ai. Aita râ o ˈna e hinaaro ra ia faarue Manu ia ˈna. Aita ˈtu hoi taata te faariro ia ˈna ei tamahine nehenehe mau e te taa ê. E manaˈo o ˈna: “I te tahi aˈe pae, te here nei mâua Manu . . .”
Mai te peu e ua tia to oe matahiti no te haamatau i te tahi atu e tei roto oe i te tupuraa o Hina, eaha ta oe e rave i muri iho?
A PARAHI E A FERURI!
E ô no ǒ mai i te Atua te taotoraa i te taata ta oe noa i faaipoipo. Eita e faaohipa-maitai-hia tera ô ia na reirahia hou te faaipoiporaa. Mai te tamâraa ïa i te fare e te hoê ahu nehenehe mau i horoahia mai
Ia ouˈa mai oe mai nia mai i te hoê tumu raau a tamata ˈtu ai i te rere mai te manu, e mauiui oe. Hoê â huru ia ore oe e pee i te hoê ture morare mai teie: “Ia ore outou ia faaturi.”—Tesalonia 1, 4:3.
Eaha te faahopearaa ia ore e pee i teie faaueraa? Te na ô ra te Bibilia: “O te taata râ i faaturi ra, ua hamani ino oia i to ˈna iho tino.” (Korinetia 1, 6:18) Tera iho â anei?
Teie ta te feia maimi i ite mai: E pinepine e faaruru te rahiraa o te feia apî o tei taoto i te hoê taata hou te faaipoiporaa i te tahi o teie mau faahopearaa.
OTO. Ua parau te rahiraa o te feia apî tei taoto i te hoê taata hou te faaipoiporaa e ua tatarahapa ratou i muri iho.
TIATURI ORE. I muri iho i te taotoraa i te hoê taata, e haamata raua taitahi i te manaˈo, ‘O vai râ ïa ta ˈna i taoto na mua ˈˈe ia ˈu?’
INOINO. I roto i te aau, mea au aˈe na te mau tamahine te hoê taata o te paruru ia ratou, eiaha râ o te hinaaro noa e taoto ia ratou. E aita te tamaroa e rave rahi e hinaaro roa i te hoê tamahine o tei farii i te taoto ia ratou.
Haapotoraa: Ia taoto oe i te hoê taata, e faaino oe ia oe ma te ere i te tahi mea faufaa roa. (Roma 1:24) Mea faufaa roa to oe tino no te horoa noa ˈtu mai tera!
A faaite e mea puai oe no te ‘ore e faaturi.’ (Tesalonia 1, 4:3) Ia faaipoipo oe, e nehenehe oe e taoto i to oe apiti. A oaoa ˈtu ai i te reira ma te ore e haapeapea e e tatarahapa. Ma te ore e faaruru i te mau faahopearaa o te faaturi.—Maseli 7:22, 23; Korinetia 1, 7:3.
EAHA TO OE MANAˈO?
E haafifi anei te hoê taata o te here mau ra ia oe i to oe maitai pae tino e i te pae o te aau?
E turai anei te hoê taata o te here mau ra ia oe ia haafifi i to oe auhoaraa e te Atua?—Hebera 13:4.