Uiuiraa te mau Pharisea i te taata e matapo na mua ˈˈe

Aita te mau Pharisea i farii e ua faaaraara Iesu i te mata o te matapo mai to ˈna fanauraa mai. Tii aˈera ratou i to ˈna na metua, tei ite e e nehenehe raua e tiavaruhia i rapae i te sunago. (Ioane 9:22) Ia ore raua e nehenehe faahou e amuimui i te tahi atu mau ati Iuda, e fifi ïa te utuafare i te pae moni e e hiˈo-ino-hia mai ratou.

Ui maira te mau Pharisea: “Na orua teie tamaiti? E matapo o ˈna i to ˈna fanauraahia mai? Mea nafea ïa o ˈna i ite ai i teie nei?” Pahono atura na metua: “E, na mâua teie tamaiti e e matapo o ˈna i to ˈna fanauraahia mai. Aita râ mâua i ite mea nafea to ˈna iteraa i teie nei, aita atoa mâua i ite na vai i faaaraara i to ˈna mata.” Noa ˈtu e ua faatia ˈtu ta raua na tamaiti i te ohipa i tupu, ua haapao maitai raua i ta raua pahonoraa, a na ô ai: “A ui ia ˈna. E ere faahou o ˈna i te tamarii. Na ˈna iho e pahono ia outou.”—Ioane 9:19-21.

Pii faahou maira ïa te mau Pharisea i te tamaiti e haamǎtaˈu maira ia ˈna e e haapapuraa ta ratou e faahapa ra ia Iesu. Na ô maira ratou: “A faahanahana i te Atua ma te faaite i te parau mau. Ua ite matou e e taata rave hara tena.” Patoi atura oia i ta ratou pariraa: “Aita vau i ite e e taata rave hara anei o ˈna. Ta ˈu râ i ite, e matapo vau na mua ˈˈe, i teie nei te ite ra vau.”—Ioane 9:24, 25.

Aita te mau Pharisea i tuu, a na ô faahou ai: “Ua aha o ˈna ia oe? Mea nafea to ˈna faaaraararaa i to oe mata?” Pahono atura te taata taparu ma te taiâ ore: “Ua faaite aˈena vau ia outou, aita râ outou i faaroo mai. No te aha ïa outou e hinaaro faahou ai e faaroo i ta ˈu pahonoraa? Te hinaaro ra outou e riro ei pǐpǐ na ˈna?” Faaino maira te mau Pharisea tei riri: “E pǐpǐ oe na tera taata, matou râ, e pǐpǐ ïa na Mose. Ua ite matou e ua paraparau te Atua ia Mose, teie râ taata, aita ïa matou i ite nohea mai o ˈna.”—Ioane 9:26-29.

Na ô atura te taata taparu: “Te maere nei au e aita outou i ite nohea mai o ˈna, e na ˈna hoi i faaaraara i to ˈu mata.” Haaferuri maitai atura oia o vai ta te Atua e faaroo e e farii: “Ua ite tatou e eita te Atua e faaroo i te feia rave hara, te taata râ e mǎtaˈu i te Atua e e rave i to ˈna hinaaro, o ˈna ta ˈna e faaroo. Aita hoi i faaroohia aˈenei e ua faaaraara te tahi taata i te mata o te hoê matapo mai to ˈna fanauraahia mai.” Na ô atura oia: “Ahiri e ere o ˈna i te taata no te Atua, aore roa ïa e mea e tia ia ˈna ia rave.”—Ioane 9:30-33.

Aita i tia i te mau Pharisea ia patoi i teie haaferuriraa. Faaino maira ratou ia ˈna: “Ua fanau-roa-hia oe i roto i te hara, e na oe ïa e haapii mai ia matou?” Tiavaru ihora ratou ia ˈna.—Ioane 9:34.

Faaroo ihora Iesu i te ohipa i tupu. I te itearaa mai ia ˈna te taata taparu, ui maira oia: “Te tiaturi ra anei oe i te Tamaiti a te taata nei?” Pahono atura teie taata: “E te Fatu, o vai ïa oia e tiaturi ai au ia ˈna?” Na ô roa maira Iesu: “Ua ite oe ia ˈna, inaha te taata e paraparau nei ia oe, o ˈna ïa.”—Ioane 9:35-37.

Parau atura teie taata: “E te Fatu, te tiaturi nei au ia ˈna.” Ma te faaroo e te faatura, tipapa ihora oia i raro i mua ia Iesu, tei faahiti i teie parau hohonu: “Ua haere mai au i roto i teie nei ao ia haavahia te taata: ia ite hoi te feia aita e ite nei, e ia riro te feia e ite nei ei matapo.”—Ioane 9:38, 39.

Ua ite te mau Pharisea, to reira atoa, e ere ratou i te matapo. Mai te aha râ te huru o ta ratou hopoia aratai i te pae varua? Ui maira ratou tei inoino: “E matapo atoa anei ïa matou?” Na ô atura Iesu: “Ahiri e matapo outou, aita ïa e hara ta outou. Te parau nei râ outou: ‘Te ite nei matou.’ E ore ïa ta outou hara e faaorehia.” (Ioane 9:40, 41) Ahani e ere ratou i te orometua haapii i Iseraela, eita ïa e maerehia ia patoi ratou ia Iesu te Mesia. Ua ite râ ratou i te ture a Mose, ua hara ïa ratou i to ratou patoiraa ia ˈna.