Mai ia Iesu, e riro anaˈe ei taata. . .

AUMIHI

Aita Iesu te hoê taata tia roa i faaruru i te mauiui e te haapeapearaa e rave rahi mai to te tahi atu mau taata. Noa ˈtu râ, ua faaite oia i te aumihi. Ua ineine oia i te tauturu ia ratou, i te rave i te tahi mau mea hau aˈe i tei titauhia. No to ˈna aumihi i tauturu ai oia ia vetahi ê. A feruri i te mau hiˈoraa i na pene 32, 37, 57, 99.

OHIE IA FAAFATATA ˈTU

Ua faafatata noa ˈtu te taata atoa, te feia apî e te feia paari, ia Iesu, no te mea aita oia i faaite noa ˈˈe mea ohipa roa oia aore ra “o vau teie.” Ua tâuˈa râ Iesu ia ratou tataitahi, a au roa ˈtu ai ratou ia ˈna. A hiˈo na i na pene 25, 27, 95.

PURE

Ua matau Iesu i te pure i to ˈna Metua ma to ˈna aau atoa, o ˈna anaˈe anei aore ra e ta ˈna mau pǐpǐ. Pinepine oia i te pure, eiaha noa i te taime tamaaraa. Ua pure oia no te haamauruuru i to ˈna Metua, no te arue ia ˈna e no te ani i ta ˈna aratairaa hou a rave ai i te mau faaotiraa faufaa. A hiˈo i na pene 24, 34, 91, 122, 123.

TÂUˈA IA VETAHI Ê

I te mau taime i hinaaro mau ai oia e faafaaea rii no te rohirohi anei, ua tâuˈa noa oia ia vetahi ê na mua. E hiˈoraa maitai atoa teie e nehenehe tatou e pee maite. A hiˈopoa i taua hiˈoraa ra i na pene 19, 41, 52.

FAAORE NOA I TE HAPA

Ua haapii Iesu ia vetahi ê i te faufaaraa ia faaore i te hapa. Ua faaore atoa râ oia i te hapa a ta ˈna mau pǐpǐ e a vetahi ê. A feruriruri i te mau hiˈoraa i na pene 26, 40, 64, 85, 131.

ITOITO RAHI

Ua tohuhia e eita te rahiraa o te mau ati Iuda e farii i te Mesia e e haapohe to ˈna mau enemi ia ˈna. E nehenehe noa ïa Iesu e faaoti eiaha e rohi no vetahi ê. Aita râ, ua turu oia ma te itoito rahi i te haamoriraa mau. Ua vaiiho mai oia i te hoê hiˈoraa itoito rahi no ta ˈna mau pǐpǐ atoa o te faaruru i te tâuˈa ore aore ra te patoiraa. A hiˈo i na pene 16, 72, 103.

HAEHAA

Ua hau ê Iesu i te mau taata tia ore i roto e rave rahi tuhaa, te ite anei e te paari. E tino e e feruriraa tia roa to ˈna. Ua tavini râ oia ia vetahi ê ma te haehaa. E ite oe i te tahi mau haapiiraa o te reira i na pene 10, 62, 66, 94, 116.

FAAOROMAI

A ore ai ta ˈna mau aposetolo e te tahi atu e pee i to ˈna hiˈoraa aore ra e faaohipa i ta ˈna mau parau, ua tamau noa Iesu i te haapii ia ratou ma te faaoromai ia piri atu â ratou ia Iehova. A feruri i to Iesu faaoromai i na pene 74, 98, 118, 135.