Hinaaro-faahou-raa te mau aposetolo i te tiaraa teitei

I to ratou tere i Ierusalema i te pae apatoa na Perea ˈtu, haere aˈera Iesu e ta ˈna mau pǐpǐ i te tahi atu pae o te anavai Ioridana, i pihai iho ia Ieriko. Te ratere atoa mai ra te tahi atu no te Pasa 33.

To mua Iesu i te mau pǐpǐ, ua faaoti oia e tae i te oire hou te Pasa. Te mǎtaˈu ra râ te mau pǐpǐ. Na mua ˈtu, i to Lazaro poheraa e a fatata ˈi Iesu i te haere i Iudea na Perea ˈtu, ua parau Toma i te tahi atu mau pǐpǐ: “Mai haere atoa tatou, ia pohe hoi tatou e o ˈna.” (Ioane 11:16, 47-53) Mea atâta ïa ia haere i Ierusalema, ua tano iho â te mau pǐpǐ i te mǎtaˈuraa.

No te faaineine i te mau aposetolo no te tiai mai ra ia ratou, aratai rii ê ihora Iesu ia ratou e parau atura: “Inaha, te pauma nei tatou i Ierusalema, e tuuhia te Tamaiti a te taata nei i te rima o te mau tahuˈa tiaau e te mau papai parau. E faautua ratou ia ˈna i te pohe, a tuu atu ai ia ˈna i te rima o te feia o te mau nunaa ěê ia faaooohia, ia huihia e ia haapohehia i nia i te pou, e i te toru o te mahana e faatia-faahou-hia mai.”—Mataio 20:18, 19.

Teie te toru o te taime to Iesu parauraa i ta ˈna mau pǐpǐ no nia i to ˈna pohe e tia-faahou-raa. (Mataio 16:21; 17:22, 23) I tera râ taime, ua parau oia e e haapohehia oia i nia i te pou. Te faaroo noa ra ratou ia ˈna, aita râ e taa ra. Te manaˈo ra paha ratou e e haamauhia te faatereraa arii a Iseraela i te fenua, a fanaˈo atu ai i te hanahana e te tura i roto i te hoê faatereraa arii i te fenua e te Mesia.

O te metua vahine atoa o na aposetolo Iakobo e Ioane, e au ra o Salome, to taua tere ra. Ua mairi Iesu i teie na aposetolo i te hoê iˈoa e “tamaiti a te patiri” te auraa, eita e ore no to raua huru e au i te auahi. (Mareko 3:17; Luka 9:54) I nounou na raua i te tiaraa teitei i roto i te Faatereraa arii a te Mesia. Ua ite to raua metua vahine i te reira. Tapiri maira oia ia Iesu e tipapa ihora i mua ia ˈna no te ani i te tahi mea no ta ˈna na tamaiti. Na ô atura Iesu: “Eaha ta oe e hinaaro?” Pahono maira oia: “A faaue na ia parahi ta ˈu na tamaiti nei i roto i ta oe Faatereraa arii, hoê i to rima atau e te tahi i to rima aui.”—Mataio 20:20, 21.

Na Iakobo raua Ioane teie aniraa. No faahiti iho nei Iesu i te haama ta ˈna e faaruru. Na ô atura oia ia raua: “Aita orua i ite i ta orua e ani mai nei. E haere anei ia orua ia inu i ta ˈu e fatata i te inu?” Na ô maira raua: “E haere ia mâua.” (Mataio 20:22) Aita iho â raua e taa ra i te auraa o teie parau.

Parau atura râ Iesu: “E inu iho â orua i ta ˈu e inu, te parahiraa râ i to ˈu rima atau e i to ˈu rima aui, e ere na ˈu e horoa ˈtu, no te feia râ no ratou i faaineine ai to ˈu Metua i teie na parahiraa.”—Mataio 20:23.

I to te tahi atu na aposetolo hoê ahuru faarooraa i ta Iakobo raua Ioane aniraa, inoino ihora ratou. Ua faaite roa ˈtu anei raua i to raua manaˈo i to ratou mârôraa na mua ˈtu o vai tei rahi aˈe? (Luka 9:46-48) Te faaite ra râ teie aniraa e aita na 12 i faahaehaa ia ratou mai ta Iesu i aˈo. Te hinaaro noa ra ratou i te tiaraa teitei.

Faaoti ihora Iesu e faaafaro i teie mârôraa hopea e te inoino i tupu mai. Pii ihora oia i na 12 e aˈo atura ma te here: “Ua ite outou e te faatere ra te mau arii o teie nei ao i te mau nunaa o te haavî-atoa-hia ra e te feia mana. Eiaha roa mai tera i rotopu ia outou, o tei hinaaro hoi ia rahi oia i rotopu ia outou, ia riro ïa ei tavini no outou e tia ˈi, e o tei hinaaro o ˈna na mua i rotopu ia outou, ia riro ïa ei tavini no outou paatoa.”—Mareko 10:42-44.

Faahiti ihora Iesu i to ˈna iho hiˈoraa mea maitai ia pee ratou, a faataa ˈi: “Ua haere atoa mai te Tamaiti a te taata nei eiaha ia tavinihia oia, no te tavini râ e no te horoa i to ˈna ora ei hoo no te taata e rave rahi.” (Mataio 20:28) A toru atura matahiti to ˈna taviniraa ia vetahi ê. E na reira â oia a pohe atu ai no te huitaata! Mea faufaa ia hoê â huru feruriraa to te mau pǐpǐ e to te Mesia, te taviniraa ia vetahi ê ma te aau tae eiaha râ ia tavinihia ratou, ia faahaehaa ia ratou eiaha râ ia hinaaro i te tiaraa teitei.