Faufaaraa o te pure e te haehaa

Ua faatia aˈena Iesu i ta ˈna mau pǐpǐ i te hoê faahohoˈaraa no nia i te tamauraa i te pure. (Luka 11:5-13) Tei Samaria aore ra Galilea paha oia i haapapu faahou ai oia i te faufaaraa o te reira na roto i teie faahohoˈaraa:

“E haava tei te hoê oire. Aita oia e mǎtaˈu ra i te Atua e aita e tâuˈa ra i te taata. E vahine ivi atoa tei taua oire ra. E haere noa oia e parau i te haava: ‘A haava mai na ia ˈu e te taata i horo ia ˈu i te haavaraa ma te parau-tia.’ Aita râ te haava i farii oioi, i muri aˈe râ, feruri ihora oia: ‘Aita vau e mǎtaˈu ra i te Atua e aita atoa e tâuˈa ra i te taata, no te mea râ e haapeapea noa teie vahine ivi ia ˈu, e haava vau ia ˈna ma te parau-tia a ore atu ai oia e haere noa mai, a taahoa ˈtu vau ia ˈna no to ˈna onoono.’”—Luka 18:2-5.

Faataa ˈtura Iesu i te haapiiraa: “A faaroo i ta te haava i parau, noa ˈtu e e taata parau-tia ore oia! E ore anei ïa te Atua e rave e ia haavahia ma te parau-tia te feia ta ˈna i maiti, o te taparuparu ra ia ˈna i te rui e te ao, a faaoromai noa ˈi oia ia ratou?” (Luka 18:6, 7) Eaha ta Iesu e faaite ra no nia i to ˈna Metua?

Aita Iesu e parau ra e mai te haava parau-tia ore te Atua ra o Iehova. E manaˈo taa ê ta ˈna e horoa ra: Mai te peu e pahono te hoê haava parau-tia ore i te mau taparuraa onoono, papu roa e na reira atoa te Atua. E Atua parau-tia oia e te maitai o te pahono mai ia tamau noa to ˈna nunaa i te pure ia ˈna. Ua parau hoi Iesu e e rave iho â te Atua e ia haava-oioi-hia ratou ma te parau-tia.—Luka 18:8.

Pinepine eita te feia haihai e te riirii e haavahia ma te parau-tia, o te feia mana râ e te taoˈa rahi te tâuˈahia. E ere te Atua mai tera. I te taime faataahia, e faautua oia i te feia ino ma te tano, e e fanaˈo ta ˈna mau tavini i te ora mure ore.

O vai ma e faaroo to ratou mai to te vahine ivi? Ehia te tiaturi mau ra e e rave iho â te Atua e ia haava-oioi-hia ratou ma te parau-tia? No faahohoˈa iho nei Iesu i te faufaaraa ia tamau i te pure. No nia râ i te faaroo e mea puai mau te pure, ui atura oia: “Ia tae mai te Tamaiti a te taata nei, e ite anei oia i teie huru faaroo i te fenua nei?” (Luka 18:8) Mea varavara ïa te taata e faatupu i teie huru faaroo ia tae mai te Mesia.

Te manaˈo ra vetahi e faaroo ra ia Iesu e faaroo papu to ratou. Te tiaturi ra ratou e e taata parau-tia ratou, mea vahavaha râ ratou ia vetahi ê. No ratou ïa teie faahohoˈaraa a Iesu:

“E piti taata tei haere i te hiero e pure, e Pharisea hoê, e titau tute te tahi. Tia noa ihora te Pharisea e pure atura i roto i to ˈna aau mai teie: ‘E te Atua e, te haamauruuru atu nei au ia oe i te mea e ere au mai te tahi atu mau taata, e eiâ hoi, e feia parau-tia ore, e faaturi. E ere atoa vau mai tera titau tute. E haapae au i te maa e piti taime i te hebedoma. E horoa vau i te tuhaa ahuru o te mau mea atoa i noaa mai ia ˈu.’”—Luka 18:10-12.

Ua matauhia te mau Pharisea no te faaiteite i to ratou faahua parau-tia ia faahiahia te taata. I haapae na ratou i te maa, na ratou iho i haamau i teie peu, i te Monire e te Mahana maha, mea taata roa hoi na te matete. Mea rahi ïa te ite mai ia ratou. Mea horoa atoa ratou i te tuhaa ahuru o te mau raau tupu atoa. (Luka 11:42) Tau avaˈe na mua ˈtu, ua faahiti ratou i to ratou vahavaha no te feia riirii: “Teie . . . mau taata aita i ite i te ture a Mose [te manaˈo ïa o te mau Pharisea], eita roa ïa te Atua e au ia ratou.”—Ioane 7:49.

Na ô faahou atura Iesu: “Te titau tute râ, te tia noa ra ïa i te atea ê e aita i hinaaro noa ˈˈe e hiˈo i nia i te raˈi. Na ô ihora oia a tupaipai noa ˈi i to ˈna ouma: ‘E te Atua e, aroha mai oe ia ˈu te hoê taata hara.’” Te faˈi ra te titau tute ma te haehaa i ta ˈna mau hapa. Na ô atura Iesu: “Te parau atu nei au: Ia hoˈi oia i te fare, o ˈna te taata parau-tia aˈe i te aro o te Atua eiaha tera Pharisea. Te taata hoi o te faateitei ia ˈna, e faahaehaahia ïa. Te taata râ o te faahaehaa ia ˈna, e faateiteihia ïa.”—Luka 18:13, 14.

Te haapapu ra Iesu i te faufaaraa ia haehaa. E aˈoraa maitai teie no ta ˈna mau pǐpǐ, tei paari mai i roto i te hoê nunaa mea faufaa roa no te mau Pharisea faahua parau-tia te toroa e te tiaraa. E aˈoraa faufaa atoa no te mau pǐpǐ atoa a Iesu.