Faufaaraa ia faaore i te hara

Ua faaroo Petero i ta Iesu aˈoraa e ia faaafaro e piti taeae i to raua fifi o raua anaˈe. E au ra râ te hinaaro ra oia e ite ehia taime ia tutava ˈi te hoê taeae i te na reira.

Ui maira Petero: “E te Fatu, ehia taime e tia ˈi i to ˈu taeae ia hara mai ia ˈu e ia faaore au i ta ˈna hara? E hitu anei taime?” E toru taime ia au i te tahi mau aratai haapaoraa. Ua manaˈo paha ïa Petero e mea maitai aˈe o ˈna ia faaore oia i te hara a to ˈna taeae e hitu taime.—Mataio 18:21.

Aita râ te tapaopaoraa i te rahiraa taime i hapa mai ai te tahi taata e tuati ra e ta Iesu haapiiraa. Pahono atura oia ia Petero: “Te parau atu nei au ia oe: Eiaha e hitu taime, e 77 râ.” (Mataio 18:22) Te auraa, pauroa te taime. Eiaha Petero e taotia i te rahiraa taime e faaore ai oia i te hara a to ˈna taeae.

Faataa maitai atura Iesu ia Petero e te tahi atu i te faufaaraa ia faaore i te hara na roto i te faahohoˈaraa o te hoê tavini tei ore i pee i te huru aroha hamani maitai o to ˈna fatu. Ua hinaaro te arii ia aufau ta ˈna mau tavini i ta ratou tarahu. Arataihia maira te hoê tavini tei tarahu ia ˈna 10 000 taleni [e 60 000 000 denari]. Aita râ e moni ta ˈna no te aufau i ta ˈna tarahu. Faaue ihora ïa te arii ia hoohia te tavini, ta ˈna vahine e ta ˈna mau tamarii e pee ai ta ˈna tarahu. Tuturi ihora te tavini i te pae avae o to ˈna fatu e taparu maira: “Tiai rii na oe, e faahoˈi pauroa ˈtu iho â vau i ta oe moni.”—Mataio 18:26.

Aroha ihora te arii i te tavini e faaore noa ˈtura i ta ˈna tarahu iti rahi. I muri iho, haere atura teie tavini e ite ihora i te hoê hoa tavini tei tarahu ia ˈna 100 denari. Haru ihora oia ia ˈna e uumi atura i to ˈna arapoa, a na ô ai: “Faahoˈi pauroa mai i ta ˈu moni.” Tuturi ihora te hoa tavini i to ˈna pae avae e taparu maira: “Tiai rii na oe, e faahoˈi atu iho â vau i ta oe moni.” (Mataio 18:28, 29) Aita râ te tavini ua faaorehia ta ˈna tarahu e te arii i pee i te hiˈoraa o to ˈna fatu. Ua faaue râ oia ia hurihia to ˈna hoa tavini, mea iti aˈe ta ˈna moni e faahoˈi, i roto i te fare tapearaa e ia pee noa ˈtu ta ˈna tarahu.

Faatia ˈtura Iesu e ua haere te tahi atu mau tavini e faaite i te fatu e aita tera tavini i aroha i to ˈna hoa tavini. Riri ihora te arii, faaue atura e tii i taua tavini ra e na ô atura: “Tavini ino, ua faaore pauroa vau i ta oe tarahu i to oe taparuraa mai. Eiaha anei ïa oe e aroha atoa i to hoa tavini, mai ia ˈu i aroha ia oe?” Tuu atura te arii tei riri roa i taua tavini ra i te mau tiai fare tapearaa e ia pee noa ˈtu ta ˈna tarahu. Na ô atura Iesu: “E na reira atoa to ˈu Metua i te raˈi ia outou ia ore outou tataitahi e faaore i te hapa a to ˈna hoa ma te aau atoa.”—Mataio 18:32-35.

Tera te haapiiraa faufaa no nia i te faaoreraa i te hara. Mea rahi ta tatou tarahu, aore ra hara, ta te Atua i faaore. Noa ˈtu eaha te hapa a te hoê taeae ia tatou, mea iti ïa. E faaore atoa Iehova i ta tatou mau hara, eiaha hoê noa taime, e rave rahi râ taime. Eita anei ïa ta tatou e nehenehe e faaore noa ˈtu i te hapa a to tatou taeae, ia hapa noa mai oia? Mai ta Iesu i haapii i roto i ta ˈna Aˈoraa i nia i te mouˈa, e faaore te Atua i ta tatou mau tarahu, mai ia tatou atoa i faaore i ta vetahi ê.—Mataio 6:12.