E nehenehe anei e rave i te ohipa maitai i te Sabati?

Mea rahi ta Iesu i rave i te roaraa o ta ˈna taviniraa ati aˈe Galilea. Ua parau râ oia: “Ia faaite atoa vau i te parau apî oaoa o te Faatereraa arii a te Atua i te tahi atu mau oire e tia ˈi.” E ere o Galilea noa ta ˈna e manaˈo ra. Haere atura ïa oia e “poro i roto i te mau sunago i Iudea.” (Luka 4:43, 44) Mea tano te reira, e Mati aore ra Eperera hoi e te piri mai ra te hoê oroa i Ierusalema.

Ua ite tatou i ta Iesu taviniraa na Galilea i roto i te mau Evanelia. No ta ˈna râ taviniraa na Iudea, mea iti ïa ta tatou i ite. Noa ˈtu te tâuˈa ore o te rahiraa o te taata i Iudea, aita Iesu i faaea i te poro ma te itoito rahi e i te rave i te mau ohipa maitatai i te mau vahi atoa ta ˈna i haere.

Haere ihora Iesu i Ierusalema, te oire rahi o Iudea, no te Pasa 31. I pihai iho i te Uputa o te mau mamoe, mea taata na reira, te vai ra te hoê pape hopu rahi haaatihia e pae anairaa pou, parauhia Betezeta. Mea rahi te taata maˈi, te matapo e te piriˈoˈi te haere mai i taua vahi ra. No te aha? No te mea i manaˈohia na e e ora te maˈi o te taata e tuuhia i roto i te pape ia arepurepu te pape.

E Sabati taua mahana ra. Ite atura Iesu i te hoê tane i taua pape hopu ra e 38 matahiti to ˈna maˈi-noa-raa. Ui atura Iesu: “Hinaaro anei oe ia maitai mai oe?” Pahono maira te tane maˈi: “Aita hoi ta ˈu e taata no te tuu ia ˈu i roto i te pape ia arepurepu te pape. E ia haere atu vau, e na mua mai te tahi atu ia ˈu.”—Ioane 5:6, 7.

Parau atura Iesu i te tahi parau eita e ore e ua maere te tane e te tahi atu tei faaroo: “A tia, a rave i to oe roˈi e a haere.” (Ioane 5:8) I reira iho, tia aˈera taua tane ra, ua ora to ˈna maˈi, rave ihora i to ˈna roˈi e haere atura!

Aita te mau ati Iuda i oaoa i te ohipa faahiahia i tupu. I to ratou iteraa mai i taua tane ra, faahapa maira ratou ia ˈna: “E Sabati teie, mea opanihia ia amo oe i to oe roˈi.” Pahono atura taua tane ra: “Na te taata hoi o tei faaora i to ˈu maˈi i parau mai: ‘A rave i to oe roˈi e a haere.’” (Ioane 5:10, 11) Te faahapa ra taua mau ati Iuda ra i te taata e faaora ra i te maˈi i te Sabati.

No to ratou hinaaro e ite, ui maira ratou: “O vai tei parau ia oe: ‘A rave i to oe roˈi e a haere’?” Eaha hoi ratou i ui ai i teie uiraa? No te mea “ua faarue Iesu i taua vahi ra,” e aita te tane i ite i te iˈoa o tei faaora i to ˈna maˈi. (Ioane 5:12, 13) I muri iho râ, farerei faahou atura taua tane ra ia Iesu i te hiero, e ite atura na vai i faaora i to ˈna maˈi i te pape hopu.

Farerei atura te tane ua ora to ˈna maˈi i te mau ati Iuda tei ui mai ia ˈna na vai i faaora i to ˈna maˈi. Parau atura oia e na Iesu. A faaroo ai ratou i te reira, haere maira te mau ati Iuda ia Iesu ra, e ere no te ite maoti te aha i nehenehe ai Iesu e rave i taua mau ohipa faahiahia mau ra. E ere, no te faahapa râ ia Iesu i te raveraa i te mau ohipa maitatai i te Sabati. Haapeapea atoa maira ratou ia ˈna!