Tere o te utuafare o Iesu i Ierusalema

Tae maira te taime e reva ˈi Iosepha e to ˈna utuafare, e te mau hoa e te fetii, i Ierusalema, mai ta ratou i matau pauroa te matahiti. E haere ratou i ǒ no te oroa Pasa, mai ta te ture a Mose e titau ra. (Deuteronomi 16:16) Mai Nazareta e pou atu i Ierusalema, piri ïa i te 120 kilometera i te atea. Ratou pauroa te faaineine i te tere e mea oaoa roa. Te tiai ru ra Iesu, 12 matahiti, i te oroa e te neheneheraa e tia faahou i pihai iho i te hiero.

No Iesu e to ˈna utuafare, e ere te Pasa i te hoê oroa hoê noa mahana. I te otiraa iho â te Pasa, o te Oroa pane hopue ore e hitu mahana to muri mai. (Mareko 14:1) I manaˈohia na e e tuhaa taua oroa ra no te Pasa. Piri i te piti hebedoma te tere mai i ǒ ratou i Nazareta, te faaearaa i Ierusalema, e te hoˈiraa i ǒ ratou. I tera râ matahiti, no te tahi ohipa ta Iesu i rave, e maoro atu â ïa to ratou tere. I to ratou hoˈiraa mai Ierusalema mai e itehia ˈi taua ohipa ra.

A hoˈi ai te mau ratere, i manaˈo na Iosepha raua Maria e tei te fetii e te hoa e hoˈi atoa ra i te pae apatoerau o Iesu. Tera râ, i to te mau ratere faaearaa i te hoê vahi no te taoto i taua po ra, aita Iosepha raua Maria i ite ia Iesu. Haere ihora raua e maimi ia ˈna i to raua mau hoa ra, aita râ oia ia ratou ra. Aita i itehia mai ta raua tamaroa! Hoˈi atura ïa Iosepha raua Maria i Ierusalema e maimi ia ˈna.

Hoê mahana taatoa to raua imiraa ia ˈna e aita i itehia mai. Aita atoa i te piti o te mahana. I te toru roa o te mahana i ite ai raua i ta raua tamaiti i roto i te hiero, mea rahi te piha. Te parahi ra Iesu i rotopu i te tahi mau orometua ati Iuda, a faaroo ai ia ratou e a uiui atu ai, a maere atu ai ratou i to ˈna maramarama.

“Ta ˈu tamaiti, eaha oe i na reira mai ai ia mâua?” ta Maria ïa i ui. “I ahoaho roa na mâua to metua tane i te imiraa ia oe.”—Luka 2:48.

Maere ihora Iesu i ore ai raua i ite ihea roa oia. Ui atura hoi oia: “Eaha orua i imi ai ia ˈu? Aita orua i ite e ei roto vau i te fare o to ˈu Metua?”—Luka 2:49.

I teie nei e ua itehia mai Iesu, hoˈi atura ïa oia na muri ia Iosepha raua Maria i ǒ ratou i Nazareta, e auraro noa ˈtura oia ia raua. A rahi mai ai Iesu, rahi atoa ˈtura to ˈna paari. Noa ˈtu râ to ˈna apî, mea farii-maitai-hia oia e te Atua e te taata. Mai to ˈna tamarii-rii-raa mai â, ua vaiiho mai Iesu i te hiˈoraa maitai i te tapiraa i te mau ohipa pae varua e te faaturaraa i to ˈna na metua.