Ua ora ˈtu ratou i te hoê arii ino

Faaara ihora Iosepha ia Maria no te faaite i te parau apî ru. No fa noa mai ra ta Iehova melahi ia ˈna na roto i te moemoeâ, a na ô mai ai: “A tia, a rave i te tamarii e to ˈna metua vahine e a horo i Aiphiti. I reira outou e faaea ˈi e na ˈu e parau atu ia hoˈi mai. Te imi nei hoi Heroda i te taparahi haapohe i te tamarii.”—Mataio 2:13.

I reira iho, horo aˈera Iosepha, Maria e ta raua tamaiti i taua rui ra. Auaˈe iho â, no te mea faaroo ihora Heroda e ua haavare te feia hiˈo fetia ia ˈna. I parau na hoi oia ia ratou ia hoˈi mai ia ˈna ra. Aita râ, ua reva ratou i to ratou fenua. Riri roa ihora Heroda. No to ˈna hinaaro e haapohe ia Iesu, faaue ihora oia ia haapohehia na Betelehema e na te mau vahi tapiri atoa pauroa te tamaroa mai te piti matahiti e raro mai. Ua numera oia i teie faito matahiti ia au i ta te feia hiˈo fetia no hitia o te râ mai i parau ia ˈna na mua ˈtu.

Mea riaria mau â te haapoheraahia pauroa te tamaroa! Aita tatou i ite ehia tei haapohehia. Tera râ, ua faatupu te taˈi e te auê rahi o te mau metua vahine e mihi ra i ta ratou mau aiû i te hoê parau tohu Bibilia tei horoahia e Ieremia, peropheta na te Atua.—Ieremia 31:15.

Ua horo ê na Iosepha e to ˈna utuafare i Aiphiti, e ua faaea i reira. I te hoê rui, fa faahou maira ta Iehova melahi ia Iosepha na roto i te moemoeâ e na ô maira: “A tia, a rave i te tamarii e to ˈna metua vahine e a haere i te fenua o Iseraela, ua pohe hoi te feia tei imi na i te rave i te ora o te tamarii.” (Mataio 2:20) Manaˈo ihora ïa Iosepha e e nehenehe o ˈna e to ˈna utuafare e hoˈi i to ratou fenua. Te tahi atu ïa parau tohu Bibilia tei tupu, oia hoi e tiihia te Tamaiti a te Atua i Aiphiti.—Hosea 11:1.

E au ra e ua manaˈo Iosepha e ia parahi to ˈna utuafare i Iudea, i pihai iho paha i te oire o Betelehema, i reira hoi ratou i te faaearaa hou a horo ai i Aiphiti. Faaroo ihora râ oia e o Arehelau, te tamaiti ino a Heroda, te arii ra i Iudea. Faaara maira ïa te Atua ia Iosepha na roto â i te moemoeâ e mea atâta ia hoˈi i Iudea. Reva ˈtura ïa Iosepha e to ˈna utuafare i apatoerau atu â e parahi ihora i te oire o Nazareta i te tuhaa fenua o Galilea, mea atea hoi i Ierusalema te pu o te oraraa faaroo ati Iuda. I Nazareta i paari mai ai Iesu, a tupu atu ai te tahi atu parau tohu: “E parauhia oia no Nazareta.”—Mataio 2:23.