E nafea matou e poro ai i te Faatereraa arii?

Tau mahana hou oia a pohe ai, ua parau Iesu: “E porohia te parau apî oaoa o te Faatereraa arii e ati aˈe te fenua ia ite te mau nunaa atoa, i reira ïa te hopea e tae mai ai.” (Mataio 24:14) E nafea râ teie ohipa pororaa e tupu ai e ati aˈe te fenua? Ma te pee ïa i te hiˈoraa o Iesu a vai ai oia i te fenua nei.—Luka 8:1.

E tutava matou i te farerei i te taata i ǒ ratou. Ua faaineine Iesu i ta ˈna mau pǐpǐ ia poro i te parau apî oaoa i tera e tera fare. (Mataio 10:11-13; Ohipa 5:42; 20:20) Ua faataahia te tahi mau tuhaa fenua e poro ratou. (Mataio 10:5, 6; Korinetia 2, 10:13) Mea naho maitai atoa te pororaa i teie mahana e e tuhaa fenua ta te mau amuiraa atoa. E nehenehe ïa ratou e “poro i te taata” mai ta Iesu i faaue.—Ohipa 10:42.

E tutava matou i te farerei i te taata i te mau vahi atoa. Ua poro atoa Iesu na te mau vahi taata, i tatahi anei aore ra i te hoê apoo pape. (Mareko 4:1; Ioane 4:5-15) E paraparau atoa matou i te taata i nia i te Bibilia i te pae purumu anei, i te fare toa, i te matete, i te uahu, aore ra na roto i te niuniu paraparau. E poro atoa matou i te feia tapiri, te mau hoa ohipa, hoa haapiiraa, e fetii ia nehenehe. Maoti teie mau tutavaraa atoa e faaroo ai e mirioni taata i te ao nei i te parau apî oaoa o “te ora.”—Salamo 96:2.

E hinaaro paha oe e faaite i te tahi hoa aore ra fetii i te parau apî oaoa o te Faatereraa arii a te Atua e te auraa o te reira no to ˈna oraraa a muri aˈe. Eiaha ïa e haamarirau.

• Ia porohia teihea “parau apî oaoa”?

• E nafea te mau Ite no Iehova e pee ai i te huru pororaa a Iesu?