HAAPIIRAA 10

Eaha te haamoriraa utuafare?

Utuafare e faatere ra i ta ratou haamoriraa utuafare — Korea apatoa

Tane e ta ˈna vahine faaipoipo e haapii amui ra i te Bibilia — Beresilia

Ite no Iehova e haapii ra i te Bibilia — Auteralia

Utuafare e aparau ra i nia i te hoê tumu parau Bibilia — Guinée

Mai tahito mai â to Iehova hinaaroraa ia amui te mau utuafare no te haapaari i to ratou taairaa e o ˈna e te tahi i te tahi atoa. (Deuteronomi 6:6, 7) No reira te mau Ite no Iehova e faataa ˈi i te hoê taime au maitai i te mau hebedoma atoa no te haamoriraa utuafare. E aparau ratou i nia i te mau mea pae varua e tano maitai i tei hinaaro-mau-hia e ratou. Noa ˈtu e aita to oe e apiti, e nehenehe oe e faataa i taua taime ra no te haamori i te Atua ma te haapii i te hoê tumu parau Bibilia ta oe e maiti.

E taime no te haafatata ˈtu â ia Iehova. Te na ô ra te Iakobo 4:8: “A faafatata ˈtu i te Atua, e e faafatata mai oia ia outou.” Ma te haapii i roto i te Bibilia i to ˈna huru e ta ˈna mau ohipa e ite maitai aˈe ai matou ia Iehova. Te tahi ravea ohie no te haamata i te haamoriraa utuafare, te faataaraa ïa maa taime no te taio haapuai i te Bibilia, ma te pee paha i te porotarama o te putuputuraa Oraraa e taviniraa Kerisetiano. E nehenehe te mero tataitahi o to oe utuafare e taio i te hoê tuhaa, a aparau atu ai outou paatoa i ta outou i haapii i roto i te Bibilia.

E taime e piri atu â ˈi te utuafare. E piri atu â te mau tane e ta ratou iho vahine faaipoipo, te mau metua e tamarii atoa, te tahi i te tahi ia haapii amui ratou i te Bibilia. Ia riro te reira ei taime oaoa e te hau e tiai-ru-hia e te utuafare i te mau hebedoma atoa. E nehenehe te mau metua e maiti, ia au i te matahiti o te mau tamarii, i te mau tumu parau e tano o Te Pare Tiairaa, o te A ara mai na! aore ra i nia i te reni Internet jw.org. E nehenehe e faahiti i te hoê fifi ta te mau tamarii i farerei i te haapiiraa e eaha te rave. E nehenehe e mataitai i te JW Haapurororaa teata (tv.jw.org) a aparau amui atu ai no nia i te reira i muri aˈe. E himene atoa i te mau himene no te mau putuputuraa o te hebedoma. E ia oti te haamoriraa utuafare, e nehenehe ratou e amuamu.

Maoti teie taime faufaa faataahia i te mau hebedoma atoa no te haamori amui ia Iehova e au roa ˈi te utuafare taatoa i te Parau a te Atua. E haamaitai rahi oia i ta outou mau tutavaraa.—Salamo 1:1-3.

No te aha matou e faataa ˈi i te taime no te haamoriraa utuafare?
E nafea te mau metua e faariro ai i teie taime ei mea oaoa no te utuafare taatoa?