No te aha Ite no Iehova?

Ite no Iehova no te taata e rave rahi, te iˈoa ïa o te hoê haapaoraa apî. Teie râ, a 2 700 matahiti aˈenei, ua faataahia te mau tavini a te Atua mau hoê roa mai to ˈna mau “ite.” (Isaia 43:10-12) Hou te matahiti 1931, i parauhia na matou Feia haapii Bibilia. No te aha râ matou i rave ai i te iˈoa Ite no Iehova?

No te faaite o vai to matou Atua. Ia au i te tahi mau papai tahito, e itehia te iˈoa o te Atua, o Iehova, hau atu i te 7 000 taime i roto i te Bibilia. Ua monohia taua iˈoa ra i roto e rave rahi huriraa Bibilia e na tiaraa Fatu aore ra Atua. Teie râ, i faaite na te Atua mau i to ˈna iˈoa ia Mose, ma te parau: “O to ˈu ïa iˈoa e a muri noa ˈtu.” (Exodo 3:15) Ua faataa ê mai ïa oia ia ˈna i te mau atua haavare atoa. Te oaoa roa nei matou i te amo i te iˈoa moˈa o te Atua.

No te faataa i ta matou ohipa. Mai te tau o Abela taata parau-tia mai â, e rave rahi tei faaite i to ratou faaroo ia Iehova, mai ia Noa, Aberahama, Sara, Mose, Davida e te tahi atu. E “nahoa rahi ite” ratou. (Hebera 11:4–12:1) Mai te hoê taata e tia ˈtu i te tiripuna no te faaite i te hapa ore o te taata e haavahia ra, ua faaoti papu matou e faaite i te parau mau no nia i to matou Atua.

Te pee nei matou ia Iesu. E “ite haapao maitai e te parau mau” oia ia au i te Apokalupo 3:14. Ua parau Iesu e “ua faaite” oia “i to [te Atua] iˈoa” e e “faaite [â oia] i te parau mau” no nia i te Atua. (Ioane 17:26; 18:37) Mea faufaa roa ïa ia amo e ia faaite te mau pǐpǐ mau a te Mesia i te iˈoa o Iehova. Ta te mau Ite no Iehova ïa e faaitoito nei i te rave.

• No te aha te Feia haapii Bibilia i rave ai i te iˈoa Ite no Iehova?

• Mai afea mai â e ite ai ta Iehova i te fenua nei?

• O vai te Ite no Iehova rahi roa ˈˈe?