Te hoê rata a te Tino aratai

E te taata poro o te Faatereraa arii here e:

A feruri na o outou hoê o te mau aposetolo e tia ra i te mouˈa Oliveta, e tei mua Iesu ia outou hou o ˈna a hoˈi ai i te raˈi. Ua parau oia: “E noaa . . . ia outou te puai ia tae mai te varua moˈa i nia iho ia outou, e e riro outou ei ite no ˈu na Ierusalema, na Iudea taatoa, na Samaria e tae noa ˈtu i te hopea o te fenua.” (Ohi. 1:8) Eaha to outou huru i tera taime?

Peneiaˈe e manaˈo outou eita e raea ia outou ia rave i ta Iesu e parau ra. E ui ïa outou: ‘Mea nafea te hoê pǔpǔ iti e nehenehe ai e poro “e tae noa ˈtu i te hopea o te fenua”?’ Haamanaˈo atura outou i te faaararaa ta Iesu i horoa i te po hou o ˈna a pohe ai: “Aita te tavini i hau aˈe i to ˈna fatu. Ua hamani ino ratou ia ˈu, e hamani ino atoa ïa ratou ia outou. Ahiri ratou i haapao i ta ˈu parau, e haapao atoa ïa ratou i ta outou. Tera râ, e na reira mai ratou ia outou no to ˈu iˈoa, aita hoi ratou i ite i tei tono mai ia ˈu.” (Ioa. 15:20, 21) Feruri atura ïa outou i teie parau ma te ui: ‘Nafea vau e poro ai i mua i te patoiraa e te hamani-ino-raa?’

Tera atoa ta tatou e ui i teie mahana. Ei Ite no Iehova, titauhia ia tatou ia poro “e tae noa ˈtu i te hopea o te fenua” i “te taata o te mau nunaa atoa.” (Mat. 28:19, 20) E nafea ïa tatou e rave ai i teie ohipa ia patoi iho â ra te taata ia tatou?

Te horoa ra te buka Ohipa i te hoê aamu faahiahia, mea nafea te mau aposetolo e te mau Kerisetiano i te senekele matamua i te pororaa maoti te turu a Iehova. E tauturu teie buka ta outou e taio ra ia haapii no nia i te mau mea tei tupu no te mau Kerisetiano e ia ite i to ratou oaoa i te maraaraa te ohipa pororaa. E maere outou i te tuatiraa e vai ra i rotopu i te mau Kerisetiano matamua e te nunaa o te Atua i teie mahana. E taa ia outou e ere noa no nia i te pororaa, no nia atoa râ i te huru faanahoraa o te reira. Ia feruri outou i te reira, eita e ore e puai to outou tiaturiraa e te tamau ra Iehova i te aratai i ta ˈna faanahonahoraa i te fenua nei.

Te tiaturi e te pure nei matou e haapuai te haapiiraa o te buka Ohipa i to outou tiaturiraa e tauturu mai Iehova ia outou e e turu atoa to ˈna varua moˈa ia outou. Ia faaitoito te reira ia outou ia tamau i te “faataa maitai” i te parau o te Faatereraa arii a te Atua e i te tauturu i te tahi atu ia fanaˈo atoa i te ora mure ore.—Ohi. 28:23; Tim. 1, 4:16.