Te faaafaroraa i te mau peapea i te pae moni

I roto i te Korinetia 1, 6:1-8, ua faahiti te aposetolo Paulo i te mau hororaa i te haavaraa i rotopu i te mau Kerisetiano. Ua peapea oia i te iteraa e ua “horo” te tahi mau Kerisetiano no Korinetia “i te tahi atu i te haavaraa a te feia parau-tia ore.” (Irava 1) Ua horoa Paulo i te mau tumu papu eiaha ˈi te mau Kerisetiano e horo te tahi i te tahi i te haavaraa a teie nei ao, ia faaafaro râ ratou i te mau peapea i roto i te faanahoraa o te amuiraa. E hiˈopoa mai tatou i te tahi mau tumu i horoahia ˈi teie aˈoraa no ǒ mai i te Atua e te tahi mau tupuraa e ore ai e tano roa teie aˈoraa no te reira.

Ia peapea tatou e te tahi atu Kerisetiano i te pae moni, e imi tatou na mua roa i te faaafaro i te reira mai ta Iehova e hinaaro, eiaha mai ta tatou iho. (Maseli 14:12) Mai ta Iesu i faaite, e mea maitai aˈe ia faaafaro oioi i te hoê peapea hou te reira a rahi roa ˈi. (Mataio 5:23-26) Tera noa râ, e mârô roa ino te tahi mau Kerisetiano, a tuu roa ˈtu ai i to ratou mau peapea i mua i te mau tiripuna. Ua parau Paulo: “Mea haama roa no outou ia horo te tahi i te tahi i te haavaraa.” No te aha? Te hoê tumu rahi, oia ïa e nehenehe tera mau haavaraa e faaino i te roo maitai o te amuiraa e o te Atua ta tatou e haamori ra. No reira tatou e feruri maitai ai i te uiraa a Paulo: “No te aha e ore ai e faaoromai noa i te ino?”—Irava 7.

Ua haaferuri atoa Paulo e ua haamau te Atua i roto i te amuiraa i te hoê faanahoraa maitai roa no te faaafaro e rave rahi peapea. E Kerisetiano te mau matahiapo tei noaa mai te paari maoti to ratou ite i te pue parau mau Bibilia, e te parau ra Paulo e e “nehenehe [ratou] e haava i rotopu i t[e] mau taeae” no nia i “te mau mea o teie oraraa.” (Irava 3-5) Ua faataa Iesu e mea maitai ia faaafaro i te mau peapea tei taaihia i te mau hape rahi, mai te pari haavare e te ohipa taviri, ia au i te hoê faanahoraa e toru tuhaa: A tahi, e tutava i te faaafaro i te fifi i rotopu noa i te feia e fifi ra. A piti, ia ore te taahiraa avae matamua e manuïa, a rave hoê aore ra e piti ite. E a toru, ia ore atoa te piti o te taahiraa avae e manuïa, a faaite i te fifi i te amuiraa e tiahia ra e te mau matahiapo.—Mataio 18:15-17.

Parau mau, e ere te mau matahiapo i te mau paruru aore ra i te mau ona, e aita e titauhia ra ia haa ratou mai te reira te huru. Eita ratou e haamau i te mau ravea no te faaafaro i te mau peapea i te pae moni i rotopu i te mau taeae. E tutava râ ratou i te tauturu i te feia atoa e fifi ra ia faaohipa i te mau Papai e ia rave amui i te hoê faaotiraa hau. I roto i te mau tupuraa fifi atu â, e hinaaro paha ratou e farerei i te tiaau haaati aore ra te amaa a te mau Ite no Iehova. Teie râ, te vai ra te tahi mau tupuraa eita te aˈoraa a Paulo e tano no te reira. Eaha ïa vetahi o te reira?

Te hoê haavaraa i roto i te tahi mau tupuraa, e faanahoraa noa ïa aore ra e titauraa e au i te ture ma te fa miimii ore e te hau. Ei hiˈoraa, o te hoê haavaraa paha te faanahoraa hoê roa e vai ra no te fanaˈo i te hoê parau haapapuraa e ua taa te tahi nau hoa faaipoipo, i te tiaraa e haapao i ta ˈna mau tamarii, no te faataa i te moni tuhaa maa, no te fanaˈo i te moni hoona a te hoê parururaa, te tiaraa taata horoa tarahu i roto i te hoê hororaa no te topatariraa, e no te haamana i te hoê parau tutuu. Te vai atoa ra te mau tupuraa e manaˈo ai paha te hoê taeae e haere i te haavaraa no te paruru ia ˈna iho i te hoê hororaa.a

Mai te peu e aita tera mau hororaa i ravehia ma te hinaaro e faatupu i te peapea, aita ïa te reira e ofati ra i te manaˈo o te aˈoraa a Paulo.b Te fa matamua râ a te hoê Kerisetiano, te haamoˈaraa ïa i te iˈoa o Iehova e te hau e te auhoêraa o te amuiraa. E itehia te mau pǐpǐ a te Mesia i to ratou here na mua roa, e “eita te here . . . e imi i to ˈna iho maitai.”—Korinetia 1, 13:4, 5; Ioane 13:34, 35.