Haapiiraa 16

Ta oe faaotiraa e tavini i te Atua

Eaha te tia ia oe ia rave no te riro mai ei hoa no te Atua? (1, 2)

Nafea oe ia pûpû ia oe no te Atua? (1)

Afea oe e bapetizo ai? (2)

Nafea e noaa ˈi te puai no te tapea i to oe haapao maitai i te Atua? (3)

1. No te riro mai ei hoa no te Atua, e tia ia oe ia noaa i te ite no nia i te parau mau bibilia (Timoteo 1, 2:3, 4), ia tiaturi i te mau mea o ta oe i haapii (Hebera 11:6), ia tatarahapa i ta oe mau hara (Ohipa 17:30, 31), e ia taui roa i to oe huru oraraa. (Ohipa 3:19) I reira ïa to oe here no te Atua e turai ai ia oe ia pûpû ia oe no ˈna. Te auraa ra, e pure oe ia ˈna, o oe anaˈe, no te faaite ia ˈna e te pûpû ra oe ia oe no ˈna no te rave i to ˈna hinaaro.—Mataio 16:24; 22:37.

2. I muri aˈe i to oe pûpûraa ia oe i te Atua, e tia ia oe ia bapetizo. (Mataio 28:19, 20) E faaite te bapetizoraa i te mau taata atoa e ua pûpû oe ia oe no Iehova. No reira, te bapetizoraa, no te feia anaˈe ïa o tei naeahia i te faito matahiti e nehenehe ai ratou e rave i te faaotiraa e tavini i te Atua. Ia bapetizohia te hoê taata, e tia ia taumihia to ˈna tino taatoa maa taime iti i raro i te pape.a—Mareko 1:9, 10; Ohipa 8:36.

3. Ia oti oe i te pûpû ia oe no ˈna, e titau mai Iehova e ia haapao oe i ta oe i tǎpǔ. (Salamo 50:14; Koheleta 5:4, 5) E tamata te Diabolo i te tapea ia oe ia tavini ia Iehova. (Petero 1, 5:8) A haafatata ˈtu râ i te Atua na roto i te pure. (Philipi 4:6, 7) A tuatapapa i ta ˈna Parau i te mau mahana atoa. (Salamo 1:1-3) A vai piri noa i te amuiraa. (Hebera 13:17) Ia rave oe i teie mau mea atoa, e noaa ïa ia oe te puai no te tapea i to oe haapao maitai i te Atua. E nehenehe ïa oe e rave i te mau mea ta te Atua e titau ra ia oe e a muri noa ˈtu!

[Nota i raro i te api]