Haapiiraa 4

O vai te Diabolo?

Te Diabolo ra o Satani—nohea mai oia? (1, 2)

Nafea Satani ia haavare i te taata? (3-7)

No te aha e tia ˈi ia oe ia patoi atu i te Diabolo? (7)

1. Te auraa o te parau “diabolo,” o te hoê ïa taata o te faaite i te parau haavare ino mau no nia i te tahi atu taata. Te auraa o te iˈoa “Satani,” o te hoê ïa enemi aore ra taata patoi. E mau parau teie i mairihia i nia i te enemi rahi a te Atua. I te omuaraa ra, e melahi tia oia i nia i te raˈi i pihai iho i te Atua. I muri aˈe râ, ua faateitei rahi roa ˈˈera o ˈna ia ˈna e ua nounou atura i te haamoriraa e tano ia faataehia i te Atua anaˈe.—Mataio 4:8-10.

2. Ua paraparau atura teie melahi, o Satani, ia Eva na roto i te arai o te hoê ophi. Na roto i te haavareraa ia Eva, ua turai oia ia ˈna ia faaroo ore i te Atua. Mea na reira ïa to Satani faahaparaa i tei parauhia te “tiaraa mana arii” o te Atua, aore ra to ˈna tiaraa ei Atua Teitei roa ˈˈe. Ua uiui Satani ahiri e te faatere ra te Atua ma te au e no te maitai o To ˈna mau tavini. Ua patoi atoa Satani e e tapea te taata i to ˈna taiva-ore-raa i te Atua. Mea na reira ïa to Satani faariroraa ia ˈna iho ei enemi no te Atua. No reira oia i piihia ˈi te Diabolo ra o Satani.—Genese 3:1-5; Ioba 1:8-11; Apokalupo 12:9.

3. Te tamata nei Satani i te faahema i te taata ia haamori mai ratou ia ˈna. (Korinetia 2, 11:3, 14) Hoê ravea e haavare ai oia i te taata, o te haapaoraa hape ïa. Ia haapii anaˈe te hoê haapaoraa i te parau haavare no nia i te Atua, te turu ra ïa oia i te opuaraa a Satani. (Ioane 8:44) Peneiaˈe te tiaturi mau ra te tahi mau melo o te mau haapaoraa hape e, te haamori ra ratou i te Atua mau. I te parau mau râ, te haamori nei ratou ia Satani. O ˈna “te atua o teie nei ao.”—Korinetia 2, 4:4.

4. O te peu hiˈohiˈo te tahi atu ravea a Satani no te ume mai i te taata i raro aˈe i to ˈna mana. E taˈu paha ratou i te mau varua no te paruru mai ia ratou, no te haamauiui ia vetahi ê, no te tohu i te ohipa e tupu a muri aˈe, aore ra no te rave i te mau semeio. O Satani te mana ino i muri mai i teie mau peu atoa. No te faaoaoa i te Atua, e tia ia tatou ia haapae roa i te peu hiˈohiˈo.—Deuteronomi 18:10-12; Ohipa 19:18, 19.

5. Te haavare atoa nei Satani i te taata na roto i te teoteo o te nunaa e te haamoriraa i te mau faanahonahoraa politita. Te manaˈo nei vetahi e mea hau aˈe to ratou fenua aore ra to ratou nunaa i te tahi. Aita râ i tano. (Ohipa 10:34, 35) Te tiaturi nei vetahi atu mau taata i te mau faanahonahoraa politita no te faatitiaifaro i te mau fifi o te taata nei. Ia na reira ratou, te patoi ra ïa ratou i te Basileia o te Atua. Tera te ravea hoê roa no to tatou mau fifi.—Daniela 2:44.

6. Te tahi atu ravea e haavare ai Satani i te taata, o te faahemaraa ïa ia ratou e te mau hinaaro rave hara. Te faaue maira Iehova ia haapae i te mau peu rave hara, no te mea ua ite oia e e faaino te reira ia tatou. (Galatia 6:7, 8) E hinaaro paha vetahi mau taata e ia apiti atu oe ia ratou i roto i teie mau peu. A haamanaˈo râ, i te tupuraa mau, o Satani tera e hinaaro ra e ia rave oe i teie mau mea.—Korinetia 1, 6:9, 10; 15:33.

7. E faaohipa paha Satani i te hamani-ino-raa aore ra te patoiraa ia faarue oe ia Iehova. E riri paha vetahi o te feia o ta oe i here, no te mea te haapii ra oe i te Bibilia. E faaooo mai paha vetahi. Tera râ, tei ia vai ra to oe ora? Te hinaaro nei Satani e faariaria ia oe ia faaea oe i te haapii no nia ia Iehova. Eiaha e vaiiho ia Satani ia upootia! (Mataio 10:34-39; Petero 1, 5:8, 9) Ia patoi atu oe i te Diabolo, e faaoaoa ïa oe ia Iehova e e faaite oe e te turu ra oe i To ˈna tiaraa mana arii.—Maseli 27:11.

[Hohoˈa i te api 9]

Te haavare nei te haapaoraa hape, te peu hiˈohiˈo, e te here aiˈa i te taata

[Hohoˈa i te api 9]

A patoi ia Satani ma te haapii noa no nia ia Iehova