Pene 104

Ua faaroohia te reo o te Atua no te toru o te taime

I ROTO i te hiero, ua faaite aˈenei Iesu i to ˈna peapea ia feruri o ˈna i to ˈna pohe e fatata maira. Te tapitapi ra hoi oia no te ohipa e roohia i nia i te roo o to ˈna Metua, no reira oia i pure ai e: “E ta ˈu Metua, e haamaitai i to iˈoa.”

I reira iho, ua faaroohia maira te hoê reo puai mai te raˈi mai, i te parauraa e: “Ua haamaitai au, e e haamaitai faahou atu â vau.”

Ua maere roa ihora te nahoa taata e tia noa ra i reira. “E melahi te parau maira ia ˈna,” o ta te hoê pae ïa i haamata i te parau. Ua parau hoi te tahi pae e e patiri. Oia mau â, o te Atua ra o Iehova iho tei parau mai! Tera râ, e ere hoi te taime matamua teie e faaroohia ˈi te reo o te Atua i te parauraa mai no Iesu.

I te bapetizoraahia o Iesu, e toru matahiti e te afa na mua ˈtu, ua faaroo o Ioane Bapetizo i te Atua i te parauraa no Iesu e: “Ta ˈu Tamaiti here teie, ua mauruuru roa vau ia ˈna.” E, maa taime iti i muri aˈe i te Pasa i mairi aˈenei, i te taime a faahuru-ê-hia ˈi o Iesu i mua ia ratou, ua faaroo o Iakobo, o Ioane e o Petero i te Atua i te parauraa e: “O tau Tamaiti here teie, ua mauruuru roa vau ia ˈna; a faaroo ia ˈna.” E i teie nei, i te 10 no Nisana, maha mahana na mua ˈˈe i te poheraa o Iesu, no te toru o te taime, ua faaroo te taata i te reo o te Atua. I teie nei râ, ua parau o Iehova ia nehenehe te mau tiaa rahi taata e faaroo!

Ua faataa maira o Iesu: “E ere to ˈu i tae mai ai taua reo nei, no outou râ.” Ua riro te reira ei haapapuraa e o Iesu mau te Tamaiti a te Atua, te Mesia i tǎpǔhia mai. Te na ô faahou ra o Iesu e: “Ei teie nei e faahapahia ˈi teie nei ao, ei teie nei e hee ai te arii o teie nei ao.” Oia mau, ua haapapu te oraraa parau-tia o Iesu e ua tano mau iho â ia “hee” te Diabolo ra o Satani, te arii o te ao nei, oia hoi ia haamou-roa-hia oia.

Ma te haapapu i te mau faahopearaa o to ˈna pohe e fatata maira, ua na ô atura o Iesu e: “Area ia hopoihia vau i nia ra, e umehia mai ïa e au te taata atoa ia ˈu nei.” E ere roa ˈtu to ˈna pohe i te hoê pau, no te mea, na roto i teie ravea, e ume mai oia i te taata ia ˈna ra ia noaa hoi ia ratou te ora mure ore.

Teie râ, ua patoi aˈera te nahoa taata e: “I ite aˈenei matou i te ture ra e, e tia i te oraraa te Mesia: eaha hoi oe i parau mai ai e, E hopoihia te Tamaiti a te taata i nia? o vai hoi taua Tamaiti a te taata ra?”

Noa ˈtu â ïa te mau haapapuraa atoa i horoahia, oia atoa te reo iho o te Atua, aita te rahiraa i tiaturi e o Iesu mau te Tamaiti a te taata, te Mesia i tǎpǔhia maira. No reira, mai ta ˈna i rave tau ono avaˈe na mua ˈtu i te oroa o te Patiaraa tiahapa, ua faaau faahou atura o Iesu ia ˈna i te “maramarama” e ua faaitoito aˈera i te feia e faaroo maira ia ˈna e: “A faaroo outou i te maramarama oi vai aˈe to outou maramarama ia riro outou ei tamarii no te maramarama.” I muri aˈe i to ˈna parauraa i te reira, ua haere atura o Iesu e tapuni, e mea papu e no te mea e roohia oia i te ati.

Ua faatupu te faaroo ore o te mau ati Iuda i te mau parau a Isaia e na ô ra e ‘e haapohia te mata o te nunaa e e haameumeuhia te aau o teie nei feia, ia ore hoi ratou e faafariuhia mai e ia noaa te ora.’ Ua ite o Isaia i roto i te hoê orama i te mau aua a Iehova i nia i te raˈi, e o Iesu atoa i roto i to ˈna hanahana i pihai iho ia Iehova, hou oia e riro mai ai ei taata. E, ia au maite i te parau ta Isaia i papai, ua patoi etaeta te mau ati Iuda i te haapapuraa e O ˈna to ratou Faaora i tǎpǔhia ra.

I te tahi aˈe pae, e rave rahi mau raatira (mea papu e e mau melo no te Sunederi, te tiribuna teitei ati Iuda) tei tiaturi ia Iesu. O Nikodemo e o Iosepha Arimatea to roto ia ratou. Teie râ, aita te mau raatira, i taua taime ra, i faaite hua i to ratou faaroo, no to ratou hoi mǎtaˈu e ia faaerehia ratou i to ratou tiaraa i roto i te sunago. E pau rahi hoi to ratou!

Ua parau faahou atura o Iesu e: “O tei faaroo mai ia ˈu ra, e ere ïa vau ta ˈna e faaroo maira, i faaroo râ ia ˈna i tei tono mai ia ˈu nei ra. O tei hiˈo mai ia ˈu ra, ua hiˈo ïa i tei tono mai ia ˈu nei ra. . . . E ia faaroo mai te taata i ta ˈu ra parau, e aore i haapao, e ere ïa vau i faahapa ia ˈna, aore hoi au i haere mai e faahapa i to te ao, i haere mai râ vau e faaora i to te ao. . . . Na te parau ta ˈu i haapii ra e faahapa ia ˈna, ia tae i te mahana hopea ra.”

No to ˈna here i te huitaata nei, ua tono maira Iehova ia Iesu, ia ora te feia e tiaturi ia ˈna. E faaorahia te feia ia au i to ratou auraroraa i te mau mea ta te Atua i faaue ia Iesu ia faaite. E tupu te haavaraa i “te mahana hopea,” i roto i te Faatereraa Tausani Matahiti a te Mesia.

Ua faaoti aˈera Iesu na roto i te parauraa e: “E ere hoi i ta ˈu iho te parau ta ˈu i parau atu na, na te Metua râ i tono mai ia ˈu nei ra i faaue mai ia ˈu i te parau ia parau vau e ia haapii au. Ua ite hoi au e, o te ora mure ore ïa ta ˈna i faaue maira; e teie nei ta ˈu e parau atu ia outou nei, o ta te Metua ïa i faaue mai ia ˈu, o ta ˈu e parau nei.” Ioane 12:28-50; 19:38, 39; Mataio 3:17; 17:5; Isaia 6:1, 8-10.

▪ Eaha na taime e toru i faaroohia ˈi te reo o te Atua i te parauraa mai no Iesu?

▪ Mea nafea to te peropheta Isaia iteraa i te hanahana o Iesu?

▪ O vai ma te mau raatira o tei tiaturi ia Iesu, no te aha râ ratou i ore ai i faaite hua i to ratou faaroo?

▪ Eaha “te mahana hopea,” e haavahia te taata ia au i teihea ravea?