Pene 52

Ua faatamaa semeio Iesu i te mau tausani taata

UA OAOA roa na aposetolo e 12 i ta ratou pororaa faahiahia mau na roto ia Galilea taatoa. I teie nei, i muri noa ˈˈe i te taparahiraahia o Ioane, ua hoˈi atura ratou ia Iesu ra e ua faatia ˈtura i te mau taime faahiahia roa o ta ratou i ite. I to ˈna iteraa e ua rohirohi ratou e aita to ratou taime no te tamaa no te rahi o te taata e hahaere noa ra, ua parau atura Iesu e: ‘Haere anaˈe tatou i te hoê vahi moemoe ia faafaaea rii outou.’

Paiuma ihora ratou i nia i to ratou pahi, peneiaˈe i pihai iho ia Kaperenaumi, e fano atura i te hoê vahi moemoe, i te pae hitia o te râ iho â paha o Ioridana, i te vahi atea ˈtu ia Betesaida. Teie râ, e rave rahi o tei ite ia ratou i te revaraa ˈtu e ua faaroo atoa vetahi i te reira. Ua horo atura ratou pauroa na te pae miti, e a tapae ai te pahi, tei reira te mau taata no te farii ia ratou.

I to ˈna pouraa i rapae i te pahi, aroha ˈtura Iesu i taua feia rahi ra, no te mea mai te nǎnǎ mamoe tiai ore ra ratou. Ua faaora ˈtura oia i te feia maˈi i rotopu ia ratou e ua haamata ihora oia i te haapii ia ratou i te parau e rave rahi.

Ua mairi oioi aˈera te taime, e ua haere maira te mau pǐpǐ a Iesu ia ˈna ra e ua na ô aˈera e: “E vahi moemoe teie, e ua poto roa hoi te mahana; a tuu atu i te taata ia haere na i te mau fare e te mau oire rii fatata nei, e hoo i te maa na ratou.”

Tera râ, ua pahono atura Iesu e: “Na outou iho e hopoi atu i te maa na ratou.” I muri iho, i te mea e ua ite aˈena o Iesu e eaha ta ˈna ohipa e rave, ua ani ihora oia ia Philipa no te tamata ia ˈna e: “Ei hea tatou e hoo ai i te maa ei faaamuraa ˈtu i teie nei mau taata?”

I to Philipa hiˈoraa, aita ïa e ravea. Oia mau, te vai ra i reira e 5 000 tane e peneiaˈe ua hau atu i te 10 000 taata ia taio-atoa-hia te mau vahine e te mau tamarii! No reira o Philipa i pahono atu ai e: “Ia piti noa ˈtu â hanere i te moni veo ia hoo i te maa [hoê moni veo, o te moni ohipa ïa no te hoê mahana i tera ra tau], eita roa e ravai ia tataitahi hua iti i te taata hoê.”

Peneiaˈe no te haapapu e eita roa ˈtu e nehenehe e faatamaa i teie rahiraa taata, ua parau maira o Anederea e: “E pae a te hoê tamaiti iti nei pane, e piti hoi iˈa,” e ua na ô faahou aˈera oia e: “Eaha ra hoi te reira e ravai ai i teie nei feia rahi?”

I te mea hoi o te tau tupuraa raau teie, na mua noa ˈˈe i te Pasa o te matahiti 32, e rave rahi aihere i taua vahi ra. No reira, na nia i te aniraa a Iesu, ua titau ihora te mau pǐpǐ i te mau taata ia tarava i nia i te aihere, e 50 i te tahi pǔpǔ e 100 i te tahi. Ua rave ihora oia i na pane e pae e i na iˈa e piti ra, hiˈo atura i nia i te raˈi e haamaitai ihora. Ua ofati ihora oia i na pane e ua vahi aˈera i na iˈa. Ua horoa oia i taua maa ra i ta ˈna mau pǐpǐ ra, o tei opere atu na te nunaa. Ohipa maere mau, ua amu anaˈe ihora te mau taata atoa e paia roa ˈˈera!

I muri aˈe, ua parau ihora o Iesu i ta ˈna mau pǐpǐ e: “A haaputu na i te huˈahuˈa rii maa toea ra, eiaha te hoê vahi iti e faaruehia.” Ua faaî ratou e 12 ete rarahi i te toea maa! Mataio 14:13-21; Mareko 6:30-44; Luka 9:10-17; Ioane 6:1-13.

▪ No te aha Iesu i imi ai i te hoê vahi moemoe no ta ˈna mau aposetolo?

▪ I hea to Iesu aratairaa i ta ˈna mau pǐpǐ, e no te aha ratou i ore ai e nehenehe e faafaaea?

▪ I te mairiraa o te mahana, eaha ta te mau pǐpǐ i ani, tera râ, mea nafea to Iesu haapaoraa i te nunaa?