Pene 13

Te haapiiraa no roto mai i te mau faahemaraa a Iesu

I MURI noa ˈˈe i to ˈna bapetizoraa, ua arataihia aˈera Iesu e te varua o te Atua i roto i te medebera i Iudea. Mea rahi hoi te mau mea te tia ia ˈna ia feruri, inaha, i to ˈna bapetizoraahia, “vetea aˈera te mau raˈi,” ia taa ia ˈna i te auraa o te mau mea no te raˈi ra. No reira, mea rahi roa te mau mea te tia ia ˈna ia feruri hohonu!

Ua faaea o Iesu e 40 mahana e e 40 rui i roto i te medebara ma te ore roa ˈtu e tamaa. I muri iho, no te poia rahi o Iesu, ua haafatata maira Satani no te faahema ia ˈna, i te na ôraa ˈtu e: “E Tamaiti oe na te Atua ra, a parau i teie nei mau ofai ia riro ei maa.” Ua ite râ o Iesu e mea hape roa ia faaohipa i to ˈna mana no te faatupu i te semeio no te haamâha i to ˈna iho mau hinaaro. No reira, ua patoi atu oia i te faahemaraa.

Aita râ te Diabolo i tuu. Ua tamata oia i te tahi atu ravea. Ua parau atura oia ia Iesu ia ouˈa atu mai nia mai i te patu o te hiero ia haere mai te mau melahi a te Atua e faaora ia ˈna. Aita râ o Iesu i hinaaro e rave i teie ohipa maere mau. Ma te faahiti i te mau Papai, ua haapapu atura Iesu e mea hape roa ia na reira i te tamata i te Atua.

I roto i te toruraa o te faahemaraa, ua faaite atu te Diabolo ia Iesu, na roto i te tahi ravea semeio, i te mau basileia atoa o te ao nei ma te parau atu ia ˈna e: “E horoa ˈtu vau i teie nei mau mea atoa ia oe na ia tipapa mai oe i raro e haamori mai ia ˈu.” I reirâ, ua patoi faahou o Iesu i te faahemaraa e rave i te ohipa ino e ua maiti oia i te tapea i to ˈna haapao maitai i te Atua.

E nehenehe ta tatou e huti mai i te tahi haapiiraa i te faahemaraahia o Iesu. Ei hiˈoraa, te haapii maira te reira ia tatou e e ere noa te Diabolo i te tahi manaˈo no te ino, mai ta vetahi e parau ra, e taata itea-ore-hia mau râ oia. Te faaite atoa ra te faahemaraahia o Iesu e tei raro aˈe te mau faatereraa atoa o te ao nei i te mana o te Diabolo. Oia mau, mea nafea hoi te pûpûraa ˈtu te Diabolo i te reira na te Mesia e riro ai ei faahemaraa mau ahiri e e ere o ˈna te fatu o teie mau faatereraa?

A feruri atoa na: Ua parau te Diabolo e ua ineine oia i te haamauruuru atu ia Iesu ia haamori noa ˈtu oia ia ˈna, na roto i te horoaraa ˈtu i te mau basileia atoa o te ao nei. E nehenehe atoa te Diabolo e faahema mai ia tatou na roto i teie huru raveraa, peneiaˈe paha ma te pûpû mai i te tahi mau ravea e faaamuamu mai ia tatou ia noaa mai te faufaa materia, te mana aore ra te tiaraa teitei i roto i te ao nei. Mea paari aˈe râ ia pee tatou i te hiˈoraa o Iesu na roto i te tapearaa i to tatou haapao maitai i te Atua noa ˈtu eaha te faahemaraa! Mataio 3:16; 4:1-11; Mareko 1:12, 13; Luka 4:1-13.

▪ Eaha te mau mea ta Iesu i feruri hohonu i te roaraa e 40 mahana i roto i te medebara?

▪ Mea nafea to te Diabolo tamataraa i te faahema ia Iesu?

▪ Eaha te haapiiraa ta tatou e huti mai i te faahemaraahia o Iesu?