Vahi tamâraa hara

Auraa: “Ia au i te haapiiraa a te Ekalesia [Katolika Roma], te huru, te vahi, aore ra te tupuraa i roto i to muri iho ao . . . i reira e faaorehia ˈi te hara rii a te mau nephe o tei pohe karatia, aita râ ratou i tiamâ i te mau hapa atoa, aore ra e faautuahia ˈi ratou maa taime no te mau hara iti aore ra no te mau hara pohe o tei faaore-aˈena-hia, e mea na reira ïa ratou e tamâhia ˈi hou e haere ai i nia i te raˈi.” (New Catholic Encyclopedia, 1967, Buka XI, api 1034) E ere i te hoê haapiiraa o te Bibilia.

Ua niuhia te tiaturiraa o te vahi tamâraa hara i nia i te aha?

I muri aˈe i te hiˈopoa-faahou-raa i te mau faataaraa a te mau taata papai Katolika no nia i te mau irava mai te Makabaio 2, 12:39-45, Mataio 12:32 e Korinetia 1, 3:10-15, te faˈi ra te New Catholic Encyclopedia (1967, Buka XI, api 1034) e: “I te hiˈopoaraa hopea, ua niuhia te haapiiraa Katolika o te vahi tamâraa hara i nia i te tutuu, eiaha râ i nia i te Papai Moˈa.”

“Ua tiaturi te Ekalesia i te tutuu no te turu i te manaˈo o te hoê tuhaa ropu i te raˈi e te po auahi.”—U.S. Catholic, Mati 1981, api 7.

Mea nafea te mau tia o te Ekalesia Katolika e faataa ˈi i te huru o te vahi tamâraa hara?

“Te manaˈo ra e rave rahi taata e ua taaihia te mau mauiui atoa o te vahi tamâraa hara i te mea e ua ite te taata e ua erehia oia no te hoê taime i te mau haamaitairaa, teie râ te manaˈo o te parare roa ˈˈe e tia ia apiti-atoa-hia ˈtu te hoê faautuaraa mau . . . I roto i te Ekalesia Latino, e farii-noa-hia e e faataehia teie utua i roto i te hoê auahi mau. E ere râ teie manaˈo i te mea faufaa no te tiaturiraa i te hoê vahi tamâraa hara. E ere roa ˈtu hoi i te mea papu. . . . Noa ˈtu e e maitihia, mai te feia tuatapapa faaroo no te pae Hitia o te râ, ia faarue i te manaˈo o te mau mauiui no roto mai i te auahi, e tia ia ara eiaha oia e faariro i te vahi tamâraa hara mai te hoê vahi aita e mauiui mau. E vai noa i reira te mauiui mau, te oto, te taiâ, te manaˈo faahapa e te tahi atu mau otoraa i te pae varua o te nehenehe e faautua mau i te nephe. . . . E tia ia haamanaˈo e, i te mau tuhaa atoa, noa ˈtu to ratou mau mauiui te oaoa rahi nei teie mau nephe i te papuraa o te faaoraraa.”—New Catholic Encyclopedia (1967), Buka XI, mau api 1036, 1037.

“Aita roa ˈtu te hoê i ite eaha te tiai maira i roto i te vahi tamâraa hara.”—U.S. Catholic, Mati 1981, api 9.

E ora mai anei te nephe i te poheraa o te tino?

Ezek. 18:4: “O [“te nephe,” MN] [Hebera, neʹphesh; “te taata hara,” BFC; “te nephe,” Sg] tei rave i te hara ra, o tei pohe ïa.”

Iak. 5:20; MN: “O te faahoˈi mai i te taata hara i taua eˈa hapa na ˈna ra, e [nephe] te ora ia ˈna i te pohe, e hara rahi te moe ia ˈna ra.” (A tapao na e te faahitihia ra i ǒ nei i te poheraa o te nephe.)

No te mau haamaramaramaraa hau, hiˈo i te mau tumu parau “Pohe” e “Nephe.”

E tia anei i tei pohe ia faautua-faahou-hia no ta ˈna mau hara?

Roma 6:7; MN: “O te taata hoi i pohe ra, ua matara ïa oia i te [hara] nei.”

E nehenehe anei te feia pohe e oaoa i te manaˈo e e fanaˈo ratou i te faaoraraa?

Koh. 9:5: “Ua ite te feia e ora nei, e pohe ratou, aita râ a te feia i pohe ra e parau itea.”

Isa. 38:18: “E ore hoi te apoo e haamaitai mai ia oe [Iehova]; eita hoi e tia i te pohe ia arue mai ia oe; e ere hoi te feia i reva i te apoo ra e tiaturi i te parau mau na oe ra.” (Inaha, nafea ïa ratou e nehenehe ai e ‘oaoa rahi i te papuraa o te faaoraraa’?)

Ia au i te Bibilia, eaha te mea e tamâ ra i ta tatou mau hara?

Ioa. 1, 1:7, 9: “Ia haere râ tatou na te maramarama, mai ia ˈna [te Atua] i roto i te maramarama ra, te au nei ïa tatou tatou iho, e te mâ nei tatou i ta tatou mau hara atoa i te toto o ta ˈna Tamaiti, o Iesu Mesia ra. Ia faˈi râ tatou i ta tatou hara, e parau mau ta te Atua e te tia i te faaoreraa mai i ta tatou hara, e te tamâraa ia tatou i te mau parau-tia ore atoa.”

Apo. 1:5: “Iesu Mesia . . . tei aroha mai ia tatou nei, e ua tamâ ia tatou i ta tatou hara i to ˈna ihora toto.”