Haapiiraa 20
Te mau aˈoraa o te faaitoito
1, 2. No te aha tatou e imi ai i te mau aˈoraa, e mea nafea tatou ia farii i te reira?
1 Aita te feia haamori i te Atua mau i haamarirau i te imi i ta ˈna aratairaa i roto i to ratou mau eˈa atoa. Ma te tiaturi, ua papai te hoê taata papai salamo a te Bibilia e: “E riro oe i te aratai ia ˈu i ta oe ra parau.” (Sal. 73:24) Ua faaohipa atoa o Ieremia i teie mau parau i roto i te hoê pure no roto roa mai i te mafatu: “Aita roa e mea e ore i te oti ia oe . . . o Tei Rahi, o te Atua Puai, o Iehova sabaota ra, to ˈna iˈoa: o tei rahi ia parau ra, e te ravea rau ra.”—Ier. 32:17-19.
2 Te horoa nei Iehova i te feia e haamori nei ia ˈna i to tatou nei tau i te mau aˈoraa na roto i ta ˈna Parau i papaihia e te faanahonahoraa a ta ˈna feia haamori mau. E taa oioi i te feia o tei tapao i to ratou iˈoa i te Haapiiraa o te taviniraa teotaratia e ua niuhia te mau aˈoraa e te huru feruriraa e horoahia ˈtu i nia i te mau faaueraa tumu faahiahia o te Bibilia.
3-5. A faataa e nafea te api iti Aˈoraa no te oreroraa e te mau parau i roto i te Haapiiraa 21 e tae atu i te 37 i hamanihia no te faaohipa taatoa ia ratou.
3 Aˈoraa o te horoa-maine-hia. Ei tautururaa i te feia haapii e te tiaau no te haapiiraa, ua hamanihia te api iti Aˈoraa no te oreroraa. Te vai ra e toru ahuru ma ono tapao o te tauturu i te feia haapii ia faaite noa i te parau mau ma te aravihi atu â. E ite outou i te mau haamaramaramaraa tano e te papu no nia i te tapao tataitahi i roto i na Haapiiraa 21 e tae atu i te 37 o teie buka, ua tuuhia te hoê numera no te tapao tataitahi i nia i te api iti Aˈoraa no te oreroraa. Ua horoa-taa-ê-hia teie mau haapiiraa no te faaohipa e teie api iti. I roto i te rahiraa o te mau tupuraa, e amuihia mai e piti aore ra e toru huru e taairaa piri roa to ratou i roto i te hoê anaˈe Haapiiraa, e mea maitai aˈe ia rave ia ratou paatoa i te hoê â taime.
4 Mea maitai aˈe no te feia i tapao apî i to ratou iˈoa i te haapiiraa ia faaineine maitai ia ratou, ma te tapea mai i roto i te feruriraa te mau tapao i nia i te api iti Aˈoraa no te oreroraa. I muri aˈe i ta ratou oreroraa matamua i te Haapiiraa o te taviniraa teotaratia, e haapopou noa te tiaau no te haapiiraa (aore ra te tahi atu taeae aˈo, mai te peu e mea rahi roa te feia i tapaohia) i taua mau taata haapii apî ra no to ratou mau aravihi no te orero. I muri iho, e haapapu maine te taeae aˈo i to ˈna ara-maite-raa i nia i te hoê tapao o te tia i te taata haapii ia haamaitai. E titau râ oia i te taata haapii ia ohipa i taua tapao ra i roto i ta ˈna tumu parau i mua. Ia ineine anaˈe te hoê taata haapii ia haere i nia i te tahi atu mau tapao o te api iti aˈoraa, e faaite atu ïa te taeae aˈo ia ˈna.
5 E haere oioi vetahi feia haapii i mua, area vetahi râ e titauhia e ia ohipa ratou i te hoê noa tapao i te hoê taime maoti i te tamata i te faaohipa i te mau tuhaa taa ê o tei tuatapapahia i roto i te hoê noa Haapiiraa. Oia mau, e aˈo paha te tiaau i te tahi feia haapii ia horoa e rave rahi oreroraa parau ma te faaohipa i te hoê noa tuhaa fifi, ia aravihi maitai ratou i nia i taua tapao o te oreroraa ra hou a haere atu ai i te tapao i muri iho.
6, 7. E horoa te tiaau no te haapiiraa i te mau aˈoraa i nia i teihea mau tapao?
6 I muri aˈe i te oreroraa a te taata haapii tataitahi e horoahia te mau aˈoraa maitatai ma te hinaaro e tauturu i te taata haapii ia tamau â oia i te faarahi i to ˈna aravihi no te orero i te parau. Mai te peu e te hinaaro nei o ˈna e horoa i te hoê aˈoraa i te taata i vauvau i te oreroraa numera hoê aore ra te mau tuhaa anaanatae o te taioraa bibilia, e horoahia ïa i muri iho i te haapiiraa raua anaˈe iho. Peneiaˈe e tia paha ia aˈohia teie taata orero no te mea ua mairi roa te taime. E tutava te taata orero o te vauvau i te oreroraa parau matamua o te haapiiraa ia horoa i te hoê oreroraa o te nehenehe e ravehia ei hiˈoraa i roto i te mau tuhaa atoa; aita paha e faufaa i te tahi mau aˈoraa taa ê.
7 E horoa te tiaau i te mau aˈoraa no nia i te mau tapao tei titau-aˈena-hia i te taata haapii ia faaohipa. Oia mau, mai te peu e mea maitai te tahi tuhaa o te oreroraa parau, e nehenehe te taeae aˈo e faahiti i roto i ta ˈna haapopouraa, eita râ oia e tapao i nia i te api iti aˈoraa. Teie te mau tiro e faaohipahia: “F” (Faaohipa i teie tapao) ia tano anaˈe iho â e ia tamau te taata haapii i te ara maitai i taua huru ra i te pae o te oreroraa; “H” (Haamaitai) mai te peu e ua faaohipa aˈena te taata haapii i teie tapao, ua haere oia i mua e tia râ ia faaohipa faahou; “M” (Maitai) mai te peu e ua faaohipa maitai te taata haapii i te tapao e nehenehe oia e haere i mua i te Haapiiraa i muri iho e tano i te tahi atu huru i te pae o te oreroraa. Mai te peu e e taioraa tei horoahia na te taata haapii, e titau ïa te taeae aˈo ia ˈna ia ohipa mai i te mau tapao tano roa ˈˈe no te reira huru oreroraa.
8-10. Ia tapao te tiaau no te haapiiraa i te api iti aˈoraa, eaha ta ˈna e tapea i roto i to ˈna feruriraa no te faaitoito i te haereraa i mua o te taata haapii?
8 E tia i te tiaau no te haapiiraa ia faaite i te haapao maitai ia faahotu mai ta ˈna mau aˈoraa i te mau faahopearaa maitatai roa ˈˈe. Mai te peu e e taata orero apî, e titau hau atu â oia i te mau faaitoitoraa. E nehenehe te tahi feia orero mea maoro to ratou apitiraa i roto i te haapiiraa, e faaineine ma te maitai aˈe i ta ratou oreroraa e ma te ara maite i te mau huru o te tapao tei horoahia ia faaohipa, ua taotiahia râ to ratou aravihi. I roto i taua tupuraa ra, mai te peu e ua faaitehia mai te tahi huru maitai i roto i te oreroraa, noa ˈtu e mea iti roa, e nehenehe te tiaau no te haapiiraa e tapao i te hoê “M” i nia i te api iti aˈoraa e e horoa i te tahi atu huru na te taata haapii o te huti mai i to ˈna ara-maite-raa.
9 Tera râ, mea aravihi aˈe paha te tahi taata orero e e rave rahi to ˈna iho mau huru maitatai. Teie râ, no te mea ua tia ia ˈna ia rave i te tahi ohipa, aita oia i rave i te taime no te haapii hohonu i te huru o te tapao i horoahia e ei faahopearaa, aita o ˈna i rave mai tei tia ia ˈna ia rave. I roto i taua tupuraa ra, e haafifi te tiaau no te haapiiraa i te mau haereraa i mua o te taata haapii ia tapao oia “M” i nia i ta ˈna api iti aˈoraa e ia parau atu e e haere â i mua i nia i te tahi tapao. Mai te peu e e huru oreroraa o te faatia i te taata haapii ia faaohipa maitai aˈe i te tapao i horoahia, e tapao ïa te taeae aˈo i nia i ta ˈna api iti te hoê “F” (Faaohipa i teie tapao) e e pûpû atu i te tahi mau faaitoitoraa mǎrû o te tauturu ia ˈna ia haere i mua. E tauturuhia ïa te taata haapii ia faaineine i te mau oreroraa atoa eiaha noa no te amo i te hoê hopoia, mai te hoê râ tapao i roto i ta ratou mau haereraa i mua ei taata orero.
10 A tapea i roto i to outou feruriraa e taua faaineineraa ra no te orero e haere mǎrû noa oia i mua. Eiaha e manaˈo e e riro outou ei taata orero maitai roa ˈˈe i te hoê noa taime. E haere mǎrû noa te tereraa, e nehenehe râ e haavitiviti na roto i te mau tutavaraa rahi. Ia feruri outou i nia i te mau faataaraa i horoahia i roto i te porotarama o te faaineineraa orero e ia haapao maitai outou i ta outou iho faaineineraa orero, e ite-oioi-hia ta outou mau haereraa i mua e te feia e hiˈo nei ia outou.—Tim. 1, 4:15.
11-16. Eaha te mau tuhaa rarahi te tia i te tiaau ia apee no te horoa i te mau aˈoraa o te faaitoito?
11 Te taeae aˈo. E tia i te tiaau no te haapiiraa ia tuatapapa maitai i te mau tuhaa i faataahia no te mau hebedoma atoa, ia nehenehe oia e ite mai te peu e ua rave-maitai-hia anei te mau tumu parau i horoahia e no te faaafaro i te mau hape atoa. Teie nei râ, eiaha roa ˈtu o ˈna ia tapitapi rahi roa no te tapao i te mau hape e eita atura ïa oia e fanaˈo i te oreroraa. E tia atoa ia ˈna ia fanaˈo i te maitai o te mau parau mau faahiahia e vauvauhia.
12 Ia aˈo oia i te hoê taata haapii, e haamata oia na mua na roto i te haapopou ia ˈna no ta ˈna mau tutavaraa. I muri iho, e faataa oia i te mau tapao o te api iti aˈoraa tei tia i te taata orero ia faaohipa. Mai te peu e e tia ia haapao taa ê i te hoê tapao, e hutihia te ara-maite-raa eiaha noa i nia i te paruparu o te taata orero, i nia râ i te huru no te haamaitai i teie tapao. I reira, e faaitoito te mau aˈoraa e horoahia i te taata haapii e te tahi atu i putuputu mai.
13 Eita e navai noa ia parau i te taata orero e ua faaohipa maitai o ˈna i te hoê huru aore ra e tia faahou â e ia faaohipa mai oia i taua tapao ra. E tauturu te taeae aˈo i te feia atoa i putuputu mai na roto i te faataaraa e no te aha e mea maitai te tapao aore ra no te aha e nafea te taata haapii ia haamaitai atu â. Hau atu, mea faufaa ia faataa te mau tumu e e titauhia taua huru maitai ra i roto i te taviniraa aore ra i roto i te mau putuputuraa o te amuiraa. E turai te reira i te amuiraa atoa ia haafaufaa i teie tapao e e faaitoito i te taata haapii ia tamau â i te haapao maite atu.
14 Te ohipa a te taeae aˈo e ere ïa i te faahaamanaˈo poto noa mai i te oreroraa a te taata haapii. E tia ia ˈna ia haapoto noa e ia haapapu i ta ˈna mau aˈoraa, ma te haapao maitai e ia ore e mairi e piti minuti no te oreroraa parau tataitahi. Ia na reira oia, eita ta ˈna mau aˈoraa e mau faataaraa e paremo i roto e rave rahi parau. Oia atoa, e tano ia faahoˈi i te taata haapii i te mau api o teie buka i reira oia e ite ai i te mau haamaramaramaraa hau atu no nia i te tapao i tuatapapahia.
15 Eita te taeae aˈo e haapao rahi i te mau hape rii no te pae o te faahitiraa parau aore ra o te tarame. E anaanatae râ oia i te faahopearaa taatoa o te huru o te oreroraa. E tano anei e ia apeehia te oreroraa e e nehenehe anei e huti mai i te haapiiraa? Mea nahonaho maitai anei e te ohie ia apee atu? Te paraparau ra anei te taata haapii ma te aau rotahi e te putapû? Te faaite ra anei to ˈna hohoˈa mata e ta ˈna aparaa rima e te tiaturi mau nei oia i ta ˈna e parau ra e te hepohepo rahi ra anei oia e nafea ia horoa i te mau parau mau faahiahia i te feia e faaroo nei, aore ra i te huru rapae ta ˈna e horoa ra? Ia haapao te taata haapii i taua mau tapao ra faufaa roa, eita ïa te feia i putuputu mai e tâuˈa i te mau hape iti no nia i te faahitiraa parau e te tarame ta ˈna e rave.
16 E horoa noa te tiaau no te Haapiiraa o te taviniraa i te tahi mau aˈoraa maitatai e te faufaa. E turaihia o ˈna e te hinaaro rotahi e tauturu i te mau taata haapii. A haapao i te huru o te taata haapii ta outou e aˈo ra. E taiâ ohie anei oia? Ua taotiahia anei to ˈna ite i te pae haapiiraa? E mau tumu anei ta outou no te vaiiho-noa-raa i to ˈna mau paruparu? Na roto i ta outou mau aˈoraa, e tia i te taata haapii ia ite e te tauturuhia ra o ˈna, aita râ o ˈna e faahapahia ra. A haapao e ua taa ia ˈna i ta outou mau aˈoraa e no te aha râ.
17-19. No te haere-rahi-raa i mua na roto i te mau oreroraa tataitahi, eaha te tia i te taata haapii ia rave na mua e faaineine atu ai e i muri aˈe te oreroraa i vauvauhia?
17 A fanaˈo i te mau aˈoraa. Ia titauhia outou ia horoa i te hoê oreroraa parau i te Haapiiraa o te taviniraa teotaratia, a tapea i roto i to outou feruriraa e e ere noa no te tatara i te hoê tumu parau maramarama i mua i te amuiraa, no te haamaitai atoa râ i ta outou huru paraparau. Ia noaa mai i te mau faahopearaa maitatai i roto i taua tuhaa ra, mea faufaa ia rave outou i te taime no te hiˈopoa i te mau huru maitatai tei faaitoitohia ia outou ia faaohipa. A taio maite i te Haapiiraa o teie buka e tuatapapa ra i te tapao te tia ia outou ia faaohipa, ia ite outou e nafea ia haamaitai i ta outou faaineineraa e nafea outou ia faaite i taua huru maitai ra i roto i ta outou oreroraa. No te tauturu ia outou, ua nenei-orarahi-hia te mau tuhaa matamua o te mau huru maitatai tataitahi. E haapao ïa outou i taua mau tapao faufaa ra.
18 I muri aˈe i to outou horoaraa i ta outou oreroraa, a faaroo maite i te mau aˈoraa e pûpûhia. A farii atu ma te mauruuru, e a faaohipa i teie mau tapao tei tia ia outou ia haapao. Mai te peu e te hinaaro nei outou e haere oioi i mua, eiaha e tiai i ta outou oreroraa i muri iho no te na reira. A faahohonu i te mau tuhaa o teie nei buka e tuatapapa ra i te mau tapao tei tia ia outou ia faaohipa. A tutava no te faaohipa i te mau faataaraa i horoahia i roto i ta outou aparauraa i te mahana atoa. Ia horoa outou i ta outou oreroraa no muri iho, ua faaohipa aˈena paha ïa outou i teie mau tapao.
19 Te tapao o te taata haapii tataitahi o te haereraa ïa i mua i roto i te mau oreroraa atoa ta ˈna e horoa i te haapiiraa. Parau mau e ani te reira i te mau tutavaraa tamau, e mea papu e roaa atoa râ i te haamaitairaa a Iehova. No te taata o te hinaaro nei e fanaˈo rahi atu â i te faaineineraa e horoahia i te Haapiiraa o te taviniraa teotaratia, e auraa taa ê ïa to te mau parau i faahitihia i roto i te Maseli 19:20: “E faaroo i te parau, e farii i te aˈo, ia paari oe ia tae i to oe ra hopea.”
[Tapura i te mau api 104, 105]
Aˈoraa no te oreroraa
Taata orero: ․․․․․․․․․․․․․․․․․․․․․․․․․․․․․․․․․․
(Paeraa e iˈoa)
Nota: F - Faaohipa i teie tapao
H - Haamaitai
M - Maitai
Taio mahana Oreroraa No
Manaˈo o te horoa i te haapiiraa (21)
Maramarama, taa-maitai-hia (21)
Omuaraa parau o tei faaara i te anaanatae (22)
Omuaraa parau e tano i te tumu parau (22)
Roaraa tano roa o te omuaraa parau (22)
Puairaa o te reo (23)
Faafaaearaa (23)
Titauraa i te taata ia rave mai i te Bibilia (24)
Irava aratai-maitai-hia (24)
Irava taiohia ma te faatano i te reo (25)
Faaohiparaa i te mau irava tatara-maitai-hia (25)
Faahiti-faahou-raa no te haapapu (26)
Aparaa rima (26)
Haapapuraa i te upoo parau (27)
Manaˈo faufaa roa ˈˈe i haamatarahia (27)
Taairaa e te feia e faaroo ra, faaohiparaa i te mau nota (28)
Faaohiparaa i te tino parau (28)
Vetahi mau manaˈo: ․․․․․․․․․․․․․․․․․․․․․․․․․․․․․․․․․․․․․․․․․․․․․․
․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․
․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․
* E faahoˈi te numera tataitahi i te Haapiiraa o te Buka no te Haapiiraa o te taviniraa teotaratia i reira te tatararaahia te tapao no te oreroraa i faahitihia.
S-48-TH
Taio mahana Oreroraa No
Ohieraa o te parau (29)
Toparaa reo o te aparauraa (29)
Faahitiraa parau (29)
Au-maite-raa maoti te mau taˈo faatuatiraa (30)
Tatararaa aravihi, e te tuea maitai (30)
Faataaraa papu (31)
Haaferuriraa i te taata (31)
Aravihi o te oreroraa (32)
Tauiuiraa i te reo (32)
Manaˈo tae (33)
Mahanahana e te putapû (33)
Faahohoˈaraa e tano i te tumu parau (34)
Faahohoˈaraa e tano i te mau taata (34)
Manaˈo e tano no te pororaa (35)
Faaotiraa aravihi e te naeahia i te tapao (36)
Roaraa o te faaotiraa (36)
Taime (36)
Aueue ore e te mǎtaˈu ore (37)
Huru o te taata orero (37)
NOTA: No te tuhaa tataitahi, e hiˈopoa te taeae aˈo i te taata haapii i nia i te mau tapao taa maitai, eita e titauhia ia pee i te faanahoraa tabula i nia nei, ia haamatara râ i te mau tapao te tia i te taata haapii ia haamaitai. E nehenehe te mau area i vaiihohia i raro i te api e faaohipahia no te aˈo i te taata haapii, mai te peu e e titauhia, i nia i te mau tapao aore i papaihia i ǒ nei, mai teie te huru: tanoraa o te mau faaiteraa, faahiti-papu-raa i te parau, huru faanehenehe, pueraa parau, tarame, peu au ore, ite, ravea haapiiraa e maitairaa o te reo. Ia oti te hoê tapao i te faaohipahia e te hoê taata haapii, e reni te taeae aˈo i te area o te tapao no te oreroraa o te hiˈopoahia i te oreroraa no muri iho. E papaihia te numera o te haapiiraa i reira te tatararaahia teie tapao i nia i te api Tumu parau i te Haapiiraa o te taviniraa teotaratia (S-89) i mua nei.
[Tapura i te mau api 106, 107]
HAAPOTORAA O TE MAU HURU MAITATAI NO TE ORERORAA
Manaˈo o te horoa i te haapiiraa (21)
Mau manaˈo papu
Mau manaˈo e tano i te feia e faaroo ra
Faufaaraa o te mau manaˈo ohie ia faaohipa
Tanoraa o te mau parau
Mau haamaramaramaraa hau atu
Maramarama, taa-maitai-hia (21)
Faaohie noa i te parau
Te tatararaa i te mau parau matau-ore-hia
Eiaha ia rahi roa te mau manaˈo
Omuaraa parau o tei faaara i te anaanatae (22)
Omuaraa parau e tano i te tumu parau (22)
Roaraa tano roa o te omuaraa parau (22)
Puairaa o te reo (23)
Ia faaroohia tatou ma te fifi ore
E tano i te mau huru tupuraa
E tano i te mau manaˈo e vauvauhia ra
Faafaaearaa (23)
Faafaaearaa no te faatomaraa
Faafaaearaa no te tauiraa i te manaˈo
Faafaaearaa no te haamatara i te parau
Faafaaearaa e faahepohia e te mau tupuraa
Titauraa i te taata ia rave mai i te Bibilia (24)
Ma te titau tahaa roa ˈtu
Ma te vaiiho i te taime no te imi i te irava
Irava aratai-maitai-hia (24)
Faaara i te anaanatae no te mau irava
Huti i te ara-maite-raa i nia i te tumu o te irava
Irava taiohia ma te faatano i te reo (25)
Haapapuraa i te mau taˈo faufaa
Ravea maitai i faaohipahia
Te mau irava e taiohia e te taata
Faaohiparaa i te mau irava tatara-maitai-hia (25)
Haamatara i te mau taˈo tumu
A haapapu faahou â i te tumu o te irava
Faahiti-faahou-raa no te haapapu (26)
Faahiti-faahou-raa i te mau tuhaa matamua
Faahiti-faahou-raa i te mau tuhaa tei ore i taahia
Aparaa rima (26)
Te mau aparaa rima no te faataa
Te mau aparaa rima no te haapapu
Haapapuraa i te upoo parau (27)
Upoo parau tano
Faahiti-faahou-raa i te parau tumu aore ra i te manaˈo tumu
Manaˈo faufaa roa ˈˈe i haamatarahia (27)
Eiaha ia rahi roa
Manaˈo matamua vauvau-taa-ê-hia
Mau tuhaa iti o te haapapu i te mau manaˈo matamua
Taairaa e te feia e faaroo ra, faaohiparaa i te mau nota (28)
Taairaa ma te hiˈo i te feia e faaroo ra
Taairaa na roto i te hoê oreroraa parau manaˈo afaro
Faaohiparaa i te tino parau (28)
Ohieraa o te parau (29)
Toparaa reo o te aparauraa (29)
Parau e faaohipahia
Te huru paraparau
Faahitiraa parau (29)
Au-maite-raa maoti te mau taˈo faatuatiraa (30)
Faaohiparaa i te tahi mau taˈo arai
Mau arai e tano i te feia e faaroo ra
Tatararaa aravihi, e te tuea maitai (30)
A faanaho i te mau manaˈo ma te huru feruriraa ohie
A ape i te mau manaˈo taa ê i te tumu parau
Eiaha e haamoe i te hoê noa ˈˈe manaˈo tumu
Faataaraa papu (31)
A tuu i te mau niu
Mau haapapuraa putapû mau
Haapotoraa maitai
Haaferuriraa i te taata (31)
A tapea i te hoê manaˈo faatuea
Faataaraa navai maitai i te mau manaˈo
Faaohiparaa i nia i te feia faaroo
Aravihi o te oreroraa (32)
Haapapu i te mau taˈo e faaite ra i te manaˈo
A haapapu i te mau manaˈo tumu o te oreroraa parau
Tauiuiraa i te reo (32)
Tauiraa o te puairaa o te reo
Tauiraa o te paraparauraa
Tauiraa o te taˈiraa reo
E tano i te manaˈo aore ra i te manaˈo hohonu e faahitihia ra
Manaˈo tae (33)
Anaanatae rahi faaitehia na roto i te oraora o te huru oreroraa
Anaanatae rahi aifaito maitai i te tumu parau
Mahanahana e te putapû (33)
Na roto i te mau hautiraa o te hohoˈa mata
Na roto i te taˈiraa reo
Faitohia ia au i te tumu parau
Faahohoˈaraa e tano i te tumu parau (34)
Ohie ia taa
Faaohiparaa i faataa-maramarama-hia
Mau manaˈo faufaa i haapapuhia
Faahohoˈaraa e tano i te mau taata (34)
Hutihia mai i roto i te mau tupuraa matauhia
Maiti-maitai-hia
Manaˈo e tano no te pororaa (35)
Parau i haamaramaramahia i mua i te huiraatira
Maiti i te tahi mau manaˈo tano
Haapapu i te faufaaraa ia faaohipa i te mau manaˈo
Faaotiraa aravihi e te naeahia i te tapao (36)
Faaotiraa tuati-papu-hia i te upoo parau o te oreroraa
Faaotiraa e faaite i te feia e faaroo maira i te mea te tia
ia ratou ia rave
Roaraa o te faaotiraa (36)
Taime (36)
Aueue ore e te mǎtaˈu ore (37)
Te mau faaiteraa i nia i te tino
Te mau faaiteraa na roto i te reo
Huru o te taata orero (37)
Atuatu-maitai-raa ia ˈna iho
Tiaraa e tano
Mau taoˈa e tano
Mau hautiutiraa o te hohoˈa mata e tano