Te tatamaˈiraa: Eaha te tumu?

UA PARAU Saraha no Ghana tei faaipoipo ia Jacob 17 matahiti i teie nei: “E pinepine mâua i te tatamaˈi no te moni.” Te faataa ra o ˈna: “E inoino vau, mea rahi hoi ta ˈu e rave nei no te aupuru i te utuafare. Eita roa ˈtu Jacob e faaite mai ehia moni ta mâua. Nehenehe tau hebedoma, eita mâua e paraparau.”

Te na ô ra ta ˈna tane faaipoipo Jacob: “No te riri, e faahiti mâua i te parau mauiui mau i te tahi taime. E pinepine, aita mâua i taa i ta te tahi i hinaaro e parau e aita atoa i ite nafea ia paraparau. E tupu atoa te peapea no te mea e riri taue noa mâua.”

E taata faaipoipo apî Nathan i Initia. Te faataa ra oia i te ohipa i tupu i te hoê mahana a tatamaˈi ai to ˈna na metua hoovai. Te parau ra Nathan: “Ua mauiui roa to ˈu metua hoovai vahine e ua faarue oia i te fare. No to ˈu metua hoovai tane, aita vau i faatura ˈtu i to ˈu aniraa no te aha o ˈna i iria ˈi. I muri aˈe, o matou pauroa tei tatamaˈi.”

Ua ite atoa paha oe e fifi roa te utuafare ia faahitihia te tahi parau i te taime tano ore. E riro taue te hoê aparauraa mǎrû ei tatamaˈiraa. Eita iho â te taata e faahiti i te parau tano i te mau taime atoa. Mea ohie ïa ia ore ia taa i ta vetahi ê parau aore ra ia manaˈo ino. E nehenehe râ e faaafaro i te peapea e e vai hau noa.

Eaha te rave ia tupu te tatamaˈiraa? E nafea ia faaafaro i te peapea i roto i te utuafare? Eaha te tia i te mau utuafare ia rave no te vai hau noa? A taio â no te ite.