Ua tapea papu i ta ˈna faaotiraa

I te iteraahia to oe maˈi, ua tauturu anei te mau taote ia oe?

I te hoê maororaa e toru matahiti, e piti taote tei haapao noa i to ˈu maˈi. Ua puu roa ˈtu â râ te tupuraa o to ˈu ivi tua. Ua rahi roa te reira. Ua haamata hoi to ˈu ivi tua i te taumi i to ˈu mafatu e mahaha e ua haafifi i to ˈu hutiraa aho. Ua titauhia iho â ia tâpûhia vau.

Ua farii anei oe i te tâpûraa?

E. Ua parauhia mai e tâpûraa atâta tera. Ua naea 116 faito te puu o to ˈu ivi tua, mea rahi roa tera. No ˈu, mea taa ê atu â te fifi. No ta ˈu mau tiaturiraa niuhia i nia i te Bibilia, eita vau e farii i te pâmuraa toto.a

Ua itehia anei hoê taote o tei farii i te tâpû ia oe?

Ua farerei mâua to ˈu mama hoê taote taa maitai i Floride, Marite. I to ˈu parauraa ia ˈna eita vau e farii i te pâmuraa toto, ua pahono mai oia eita hoê noa ˈˈe taote e farii i te tâpû ia ˈu mai te peu mai tera te faanahoraa. Hau atu â, ua na ô atoa oia eita anaˈe vau e tâpûhia, e pohe au na mua ˈˈe te 20 matahiti. E 14 noa hoi matahiti to ˈu i tera taime.

Ua faataa anei oe i te tumu o tena faaotiraa?

E. Ua parau atu vau, ua niuhia ta ˈu mau tiaturiraa i nia i te Bibilia ma te faaite mea moˈa te toto taata e animara.b I tahito, e haapohehia te tahi Iseraela ia amu oia i te toto!c Ua faaite atoa vau ia ˈna i te Ohipa 15:19, 20. Ua parauhia i te mau Kerisetiano: ‘Eiaha e amu i te toto.’ Te auraa, eita e nehenehe e amu aore ra e pâmu i te reira i roto i te tino o te tahi taata.

Eaha te huru o tera taote?

Ua onoono oia i te faaohipa i te pâmuraa toto. Ua maere au ua parauhia mai eita te fare maˈi faaaufau ia ˈu i te mau haamâuˈaraa o te tâpûraa ia farii au i te pâmuraa toto.

Iae, eaha ïa ta orua to oe mama i faaoti?

E au ra aita hoê aˈe taote e farii i te tâpû ia ˈu ma te ore e faaohipa i te pâmuraa toto. Ua tapea papu noa râ mâua mama i tera faaotiraa. Taa ê atu i te reira, te vai ra te tahi atu â fifi. I mua i te ture, aitâ i naea ia ˈu te faito matahiti no te faaoti no ˈu. Noa ˈtu te ino roa ˈtura to ˈu ea, ua afaihia tera ohipa i te tiripuna. Auaˈa, ua horoa mai te auvaha ture o Floride 30 mahana no te imi hoê taote tâpû o te haapao i to ˈu hinaaro.

Ua itehia mai anei hoê?

E! Na te tomite tuatiraa e te fare maˈi a te mau Ite no Iehova o to ˈu fenua i ite mai hoê taote taa ê no te maˈi ivi tua i New York. Ua farii maitai oia i te tâpû e te farerei ia ˈu. Ua nehenehe mâua e haapao i te titauraa a te tiripuna na mua ˈˈe te taio mahana i horoahia mai.d

Ua tupu maitai anei te tâpûraa?

E! Ua tuu te taote Robert Bernstein i te mau auri no te faaafaro i to ˈu ivi tua. E piti taime vau i te tâpûraahia. Ua ravehia na mua hoê e te tahi atu e piti hebedoma i muri aˈe.

No te aha e piti tâpûraa?

Mai te peu e tahe rahi te toto i te tâpûraa matamua, e taime to to ˈu tino no te hamani atu â i te mau toropuru ura na mua ˈˈe te piti o te tâpûraa. Aita hoê aˈe fifi i itehia e mea iti roa te toto i tahe i roto i tera na tâpûraa. Auaˈa, ua faaineine maitai te pǔpǔ tâpû, mea aravihi e haapao atoa i ta ratou ohipa. Ua itoito oioi atoa mai to ˈu tino e aita hoê aˈe fifi i itehia i muri aˈe i te tâpûraa. Eita e ore no te mea aita i faaohipahia te pâmuraa toto.e

I muri aˈe, eaha te huru o to oe taote tâpû?

Ua oaoa roa oia e ua na ô: “E ere te tuhaa a te taote te tâpû-noa-raa.” No ˈna, e tia i te mau taote ia haapao i te mau hinaaro atoa o te taata maˈi, ta ˈna mau tiaturiraa e te mea faufaa no ˈna. E ere te mau Ite no Iehova anaˈe te rave i te faaotiraa mai tera.