E mau mirioni buka rairai A tutava i te haapii i te taio e i te papai tei hurihia na roto hau atu 100 reo

Ua haapii atoa ia vetahi ê i te taio e te papai

“E tiaraa no te taata te iteraa ia taio, e ravea no te haapao ia ratou iho, no te tauturu i te taata e no te haamaitai i te oraraa.”—UNESCO.a

UA FAAITE te mau titorotororaa ua hau atu 700 mirioni taata na te ao mai te 15 matahiti e hau atu tei ore i ite i te taio aore ra te papai. Eita ˈtura e tia ia ratou ia fanaˈo i te tahi atu â ite mai te mau aratairaa no te oraraa o te taata e te mau haapiiraa no nia i te Atua papaihia i roto i te Bibilia. (Roma 15:4) Taa ê atu i te pûpûraa i te haapiiraa Bibilia, e faanaho atoa te mau Ite no Iehova i te mau Piha haapii i te taio e te papai i te mau fenua e rave rahi ma te tamoni ore. Eaha te mau maitai i itehia?

E hiˈo anaˈe i te ohipa a te mau Ite no Iehova i Mehiko. O te reo Paniora te mea paraparau-roa ˈˈe-hia i ǒ. Mai 1946, ua haapii te mau Ite hau atu 152 000 taata i te taio e te papai e e rave rahi o ratou tei riro ei feia haapii ia vetahi ê. Ua papai atu to te faatereraa no ǒ e rave rahi rata haamauruururaa. I roto hoê, teie tei papaihia: “Te haamauruuru e haapopou atu ra te tomite rahi o te Haapiiraa no to outou tururaa i te ohipa haapiiraa i te feia paari.”

Ua faufaahia te feia apî e paari i tera faanahoraa no te haapii i te taio. E hanere hoê matahiti to Josefina i to ˈna apitiraa ˈtu e ua tia ia ˈna ia taio maitai i muri aˈe e piti matahiti!

Noa ˈtu e reo matamua te Paniora i Mehiko, ua faanaho-atoa-hia te mau Piha haapii i te taio e te papai na roto i te tahi atu mau reo. I 2013, ua haapii atoa vetahi no roto mai e vau pǔpǔ taata tumu no ǒ i te taio e te papai na roto i to ratou iho reo.

E ravea faufaa mau te iteraa ia taio no te haapii e rave rahi atu â ohipa apî. Hau roa ˈtu â râ, e tauturu te reira i te mau huru taata atoa ia taio i te Bibilia. Maoti hoi tera buka faaurua e te Atua e tiamâ ˈi ratou i te mau peu tahutahu, haapiiraa hape a te mau haapaoraa e te mau haerea iino.—Ioane 8:32.

a Taatiraa o te mau Nunaa amui no te haapiiraa, te ihi e te taˈere.

UA MAERE ROA TO ˈNA UTUAFARE

Ua haapii Daniel i te reo apǎraa rima Mehiko maoti te tahi DVD

E tariˈa turi Daniel e aita te taata e nehenehe e taa maitai ia ˈna. E pinepine oia i te riri e te tutuô i nia i te mau melo o to ˈna utuafare. E 23 matahiti to Daniel i te haamataraa i te haapii i te Bibilia e te tahi Ite no Iehova tariˈa turi o Josué te iˈoa. Na mua, mea faaohipa noa i te hohoˈa mata, oia atoa te mau hohoˈa papai. I muri aˈe râ, ua haapii Daniel i te reo apǎraa rima Mehiko maoti te tahi DVD.b

Ua taui Daniel i te putapûraa to ˈna aau i te mau haapiiraa Bibilia. Mai ta te mau Papai moˈa e parau ra, ua “faa-taata-apî” oia ia ˈna ma te faaite i te mau huru maitatai mai “te hamani maitai, e te haehaa, e te mǎrû, e te faaoromai rahi.” (Kolosa 3:10, 12) Ua haafaufaa atoa Daniel i te aˈoraa Bibilia ia faaroo e ia faatura i te mau metua. (Ephesia 6:1, 2) Ua maere roa to ˈna utuafare! No reira, ua taˈi te mama o Daniel e ua haamauruuru ia Josué no to ˈna tautururaa i ta ˈna tamaiti ia ite o vai te Atua. I 2007, ua faaî Daniel i te mau titauraa ia bapetizohia o ˈna ei Ite no Iehova.

b I Mehiko, 46 papai a te mau Ite no Iehova tei hurihia na roto i te reo apǎraa rima Mehiko e tei tuuhia i nia i te DVD. I nia i ta matou reni Internet jw.org, e itehia te mau papai tei hurihia na roto 80 reo apǎraa rima. E nenei-atoa-hia te mau papai no te mau matapo.