TUMU PARAU MATAMUA | NA OE ANEI E FAATERE RA I TO OE ORARAA?
Te fifi: Tupuraa eita e nehenehe e taui
UA TAUI anei to oe oraraa no te tahi maˈi tamau, no te faataaraa i to hoa faaipoipo aore ra no te pohe o tei herehia? I mua i te mau fifi mai tera, e na ô paha oe, ‘Eaha ta ˈu e rave, eita hoi au e nehenehe e taui i to ˈu tupuraa!’ E nafea ia faanaho faahou i to oraraa?
HIˈORAA BIBILIA: PAULO
Ei mitionare itoito i te senekele matamua, mea rahi te mau vahi ta te aposetolo Paulo i haere. Ua taui râ to ˈna tupuraa a tapeahia ˈi o ˈna ma te tano ore e piti matahiti i roto i te tahi fare tiaihia e te faehau. Ua haaparuparu anei Paulo? Aita, ua haapao noa oia i ta ˈna e nehenehe e rave. Ua faaohipa oia i te Parau a te Atua no te tauturu e tamahanahana i te feia atoa i haere atu e farerei ia ˈna. Ua papai atoa oia e rave rau rata o tei riro ei tuhaa o te Bibilia i teie nei.—Ohipa 28:30, 31.
TA ANJA I RAVE
Mai tei faaitehia i to na mua ˈtu tuhaa, ua titauhia ia faaea noa Anja i te fare. Te na ô ra oia: “Ua taui roa to ˈu oraraa taatoa i te mariri ai taata. Ia ore to ˈu ea ia ino roa ˈtu â, eita vau e nehenehe faahou e rave i te ohipa e e farerei e rave rahi taata.” Eita ta Anja e nehenehe e taui i to ˈna tupuraa. Eaha râ ta ˈna i rave? Te parau ra oia: “Ua tauturu mai te tahi porotarama tano. Ua haapao na mua vau i te mea faufaa roa ˈˈe no ˈu e ua faanaho i te tahi porotarama ia au i te maraa ia ˈu ia rave. Ua mauruuru vau, te tia noa ra hoi ia ˈu ia faanaho i to ˈu oraraa.”
“Ua ite hoi au i te faaoromai i te mau mea atoa i roohia mai ai au nei.”—Ta Paulo i parau i roto i te Philipi 4:11
TA OE E NEHENEHE E RAVE
Tei roto anei oe i te tahi tupuraa eita e nehenehe e taui? A tamata na i to muri nei mau manaˈo no te faanaho faahou i to oe oraraa:
A haapao noa i ta oe e nehenehe e rave. Eita paha e tia ia taui i to oe maˈi, e nehenehe râ ta oe e faaoti ia faaetaeta i te tino, ia amu i te maa maitai no te ea e ia faataa i te taime no te faafaaea.
A feruri maitai i ta oe e hinaaro e rave i roto i te oraraa. A faanaho hoê ohipa i muri mai i te tahi atu. A tamata i te faataa maa taime i te mau mahana atoa ia naea ta oe fa.
Ia mauruuru oe, a raverave maa ohipa noa ˈtu mea iti. A tamâ i te iri amuraa maa e a horoi i te mau auˈa. A haapao maitai i to oe faaahuraa. A rave na mua i te mau ohipa faufaa roa ˈˈe i te poipoi.
A tapea noa mai i te mau vahi maitai o to oe tupuraa. Ua itehia anei ia oe te tahi atu ravea maitai no te faaruru i te fifi? E nehenehe anei e faaite i te reira ia faufaa-atoa-hia vetahi ê?
Manaˈo faufaa: Eita paha e tia ia oe ia taui i te tupuraa, e nehenehe râ e faatano i to oe huru i mua i te reira.