Te ravea haaputuraa haamaramaramaraa o te ADN

IA FAAOHIPA e rave rahi i te matini roro uira, mea rahi ïa te mau haamaramaramaraa e haaputuhia a nehenehe atu ai te taata e hiˈo faahou i te reira ia hinaarohia. Te tiaturi nei te mau aivanaa e taui i te mau ravea haaputuraa haamaramaramaraa o teie tau ma te hamani i te tahi faanahoraa i au i ta te Atua i tuu i roto i te mau mea ta ˈna i poiete, oia hoi te ADN.

A hiˈo na: Tei roto te ADN i te mau taoˈa tahi ora. E nehenehe te reira e haaputu tau miria haamaramaramaraa. Te na ô ra Nick Goldman no te pu European Bioinformatics: “E nehenehe ta matou e rave mai i te reira i roto i te mau ivi o te mau elefani tahito . . . e e faataa i te mau haamaramaramaraa o te reira. Mea haihai roa e meumeu atoa te ADN, e ere i te mea ohipa rahi ia haaputu, mea ohie roa ïa ia hapono e ia haapao i te reira.” E nehenehe anei te ADN e haaputu i te tahi haamaramaramaraa a te taata? Te pahono ra te feia hiˈopoa, e.

Mai te faanahoraa haaputu haamaramaramaraa o te tahi matini uira, ua amui te mau aivanaa i te ADN e te tahi hohoˈa, ohipa haruharuhia e parau tapaohia. I nia i te faito 100, ua nehenehe te feia hiˈopoa e taa maitai eaha te auraa o te mau haamaramaramaraa i haaputuhia. No te mau aivanaa, e nehenehe e faaohipa i tera ravea, e rave mai ïa 1 tarama o te ADN hamanihia e te taata, no te haaputu i te mau haamaramaramaraa i roto hau atu e 3 000 000 CD. E tia atoa ia haaputu i te reira e hanere e peneiaˈe tausani matahiti. Te tanoraa mau, e nehenehe tera faanahoraa e haaputu i te mau haamaramaramaraa uira o te ao atoa nei. No reira e parauhia ˈi e o te ADN “te taoˈa haaputu haamaramaramaraa puai roa ˈˈe.”

Eaha to oe manaˈo? Mea tupu noa anei te ravea haaputuraa haamaramaramaraa o te ADN? Aore ra mea poietehia anei?