E aau “fanaˈo rahi” anei to oe?

EAHA te auraa o teie faahitiraa? Te parauhia ra no te feruriraa e te huru aau o te tahi taata. “Te taata maˈi” aore ra hepohepo, e haapeapea noa oia. No te reira e mahana “ino” ai to ˈna. Mea taa ê no tei “rearea te aau,” e feruri noa hoi oia i te mau mea maitatai. Ma te na reira, e aau “fanaˈo rahi to ˈna,” e ite hoi oia i te oaoa mau, mai te huru ra e e tamaaraa noa ta ˈna.

E iti mai paha te oaoa no te mau fifi, a hiˈo na râ i ta te Bibilia e faaitoito maira ia rave.

• Eiaha e vaiiho i te hepohepo o ananahi e haapeapea ia oe i teie mahana. Ua na ô Iesu: “E teie nei, eiaha e tapitapi i to ananahi ra, na ananahi hoi e tapitapi i ta ˈna iho. O te mahana o to ˈna iho ino atire ïa.”—Mataio 6:34.

• A feruri noa i te mau mea maitatai i tupu. Ia hepohepo oe, no te aha e ore ai e papai i te mau mea maitai i tupu a feruriruri atu ai i te reira? Eiaha atoa e manaˈo noa i te mau hape tahito aore ra ohipa ino i ravehia. A huti mai i te haapiiraa e a haere â i mua. Ia riro oe mai te taata faahoro pereoo o te faaohipa i te hiˈo iti no te hoê taime poto noa. Eita râ oia e hiˈo noa i te reira a faahoro noa ˈi i te pereoo. A haamanaˈo atoa e “tei ia [te Atua] ra te faaore i te hara.”—Salamo 130:4.

• Ia hepohepo oe, a faaite i to mau manaˈo i te hoê taata o te faaitoito atu. Ia au i te Maseli 12:25, no te ‘oto te aau o te taata e piˈo ai i raro; hoê roa râ parau maitai ra, oaoa aˈera ïa.’ O te fetii aore ra hoa papu paha te hopoi atu i te “parau maitai.” E ere ïa o ˈna i te taata e te feruriraa ino e “aroha mai [r]â . . . i te mau mahana atoa.”—Maseli 17:17.

Maoti te mau parau paari i roto i te Bibilia, ua nehenehe e rave rahi e oaoa ˈtu â noa ˈtu te mau fifi. Ia tauturu-atoa-hia oe i tera mau parau faufaa e tia ˈi.