Te faataa ra te tahi taote no te maˈi mape i to ˈna faaroo

A faatia mai na i to oe tamariiriiraa.

E iva matahiti to ˈu a faarue ai to ˈu utuafare i Paniora no te haere i Farani. Noa ˈtu e Katolika to ˈu na metua, ua faaea vau i te tiaturi i te Atua i te 16raa o to ˈu matahiti. No ˈu, mea ê roa ta te haapaoraa i parau i te tupu ra na te ao. Ia ui mai te tahi, mea nafea tatou i poietehia ˈi mai te peu e aita te Atua? E pahono na ïa vau, “Aitâ i tia i te mau aivanaa ia faataa, i te hoê râ mahana, e nehenehe ta ratou.”

Na te aha i turai ia oe ia maiti i te tuhaa o te hiˈopoaraa o te maˈi mape?

Ua haere au i te tahi fare haapiiraa no te riro ei taote i Montpellier, Farani. Ua faaitoito mai te hoê orometua ia maiti i te tuhaa o te hiˈopoaraa o te mau mape. E ravehia na ïa te mau maimiraa a haapao atoa ˈi i te feia maˈi. Tera iho â ta ˈu i hinaaro. I 1990, ua apiti au i te tahi maimiraa no nia i te hoê raau parauhia érythropoïétine (EPO) recombinante. E faaohipahia na te reira ia hamani te mau taoˈa tahi ora o to tatou mau ivi i te mau toropuru ura. I tera mau tau, e maimiraa apî ïa.

No te aha oe i haamata ˈi i te feruri i te vai-mau-raa o te Atua?

I 1979, ua haamata Floréal, ta ˈu tane, i te haapii i te Bibilia e te mau Ite no Iehova. O vau râ aita roa ïa i anaanatae. Mai to ˈu tamariiriiraa, ua fiu roa vau i te haapaoraa. Noa ˈtu râ, ua riro ta ˈu tane e na tamarii e toru ei Ite no Iehova e aita i maoro, e mau hoa Ite no Iehova anaˈe to mâua. Ua parau mai Patricia, te tahi hoa Ite, ia tamata i te pure. Ua na ô mai oia, “Aita e peapea e aita te Atua i te raˈi, mai te peu râ te vai mau ra o ˈna, e ite iho â ïa oe i ta ˈna e rave.” Tau matahiti i muri aˈe, ua feruri au i te tumu mau o te oraraa. Haamanaˈo aˈera vau i ta Patricia i parau mai e ua haamata i te pure.

No te aha oe i feruri ai i te tumu o te oraraa?

A totoahia ˈi na fare tahua World Trade Center i New York, ua feruri vau, no te aha te ino i rahi roa ˈi? Ua manaˈo atura: ‘Te haafifi nei te mau taata etaeta o te tahi haapaoraa i to tatou ananahi. O vau nei, ua haaatihia e te mau Ite no Iehova e faatupu ra i te hau. E ere ratou i te feia iino, te haapao ra hoi i te Parau a te Atua. Ua manaˈo atura, e mea maitai aˈe paha ia hiˈopoa roa vau i te Bibilia.’ Ua haamata aˈera vau i te taio i te reira o vau anaˈe.

Ei taote, e mea fifi anei no oe ia tiaturi i te hoê Atua Poiete?

Aita. Ua farii na iho â vau e mea faahiahia mau te hamaniraa o to tatou tino. I maere noa na hoi au i te faanahoraa o na mape o te nehenehe e faito i te hamaniraa o te mau toropuru ura i roto i te toto.

No te aha oe i maere ai i te reira?

Na te mau toropuru ura e faahaere i te mataˈi ora i roto i te tino. Ia tahe rahi te toto aore ra ia haere oe i te vahi teitei roa, e iti mai te mataˈi ora i roto i te tino. Ia tupu te reira, e hamani na mape i te EPO. E nehenehe te faito o te EPO e maraa e tausani taime. E tia ïa i te ivi ia hamani atu â i te mau toropuru ura ia rahi atu â te mataˈi ora no te tino. Mea faahiahia mau, e ere anei? Te mea maere râ, i muri aˈe noa ahuru matahiti i to ˈu hiˈopoaraa i tera faanahoraa i farii ai au e na te hoê anaˈe Atua i poiete i tera faanahoraa taa ê.

Eaha to oe manaˈo i te Bibilia?

Mea rahi te mau buka tuatapaparaa e tuiroo ta ˈu i taio, ua taa oioi râ vau e e mea taa ê te Bibilia. I te mea e e mau parau tano anaˈe to roto, e ere iho â ïa te reira no ǒ mai i te taata. Ua faahiahia roa vau i to Iesu huru. Ua itea ia ˈu e e taata mau o ˈna. E oto e e oaoa na oia e te vai ra ˈtoa hoi to ˈna mau hoa. I te mea e aita vau i hinaaro e rave i te mau papai a te mau Ite no Iehova, ua faaohipa vau i te tahi atu mau buka no te ite i te pahonoraa i ta ˈu mau uiraa.

Eaha ta oe i ite?

Ua maere roa râ vau a tohu ai te Bibilia i te matahiti o te bapetizoraa o Iesu. Ua faaite-roa-hia hoi ehia maororaa mai te 20raa o te matahiti a faatere ai te arii no Peresia Aretehasaseta e tae atu i te taime e riro ai Iesu ei Mesia.a No ta ˈu ohipa, ua matau iho â vau i te rave i te maimiraa. Ua faaohipa vau i te mau buka tuatapaparaa o te haapapu mai i te matahiti i faatere ai Aretehasaseta e te tau o te taviniraa a Iesu. Ua farii au e ua tupu mau tera parau tohu i te taime tano e mea faaurua te Bibilia e te Atua.