Te rereraa taa ê o teie manu no tua, te albatros hurleur

E ERE i te mea ohipa rahi no vetahi manu ia rere maoro. O te albatros hurleur te tahi hiˈoraa faahiahia. E 3,4 metera te roa o to ˈna pererau e to ˈna teiaha e 8,5 kilo ïa. Ma te faaohipa maa puai noa, e nehenehe teie manu e rere e tausani kilometera! No te aha? No te hamaniraa taa ê o to ˈna na pererau e ta ˈna huru rereraa.

A hiˈo na: A rere ai, e faaohipa te albatros i to ˈna mau uaua taa ê ia mahora noa to ˈna na pererau, eita ïa to ˈna mau uaua iˈo e ohipa a ore atu ai e paruparu. I te mea e ua matau maitai atoa teie manu i te mau mataˈi i tua, e tia ia ˈna e rere tau hora te maoro.

I tai, mea teitei te vahi e rere ai te albatros. E nehenehe atoa oia e taviri e e haapou ma te faaopa noa ia ˈna a rere noa ˈi. E tere vitiviti oia noa ˈtu te mataˈi na mua mai. Aita i maoro aˈenei, ua rave te mau aivanaa i te mau maimiraa no te ite mea nafea te mau manu e nehenehe e na reira. Ua faaohipahia te mau matini e porotarama roro uira taa ê no te apee i te mau manu. Ua itea i te mau aivanaa e eita te albatros e rohirohi i te mea e e faaohipa oia i te mau mataˈi no te rere i nia e no te haapou, mai te huru ra e te pee ra oia i te tahi reni e haere ra i nia e i raro. Ua parau ratou e e mea iti roa te puai ta te manu e faaohipa no te hoê taime maoro. Eaha te tupu? E rere ïa teie manu tau hora ma te hoê noa tahiriraa pererau!

Maoti tera mau maimiraa, e tia paha i te feia îite ia hamani i te faurao no te reva a ore ai te mori e pau oioi e peneiaˈe ma te ore e faaohipa i te matini turai.

Eaha to oe manaˈo? Mea tupu noa anei te ravea rereraa e na pererau o te albatros? Aore ra mea poietehia anei?