Ua tauturu te reira ia raua ia faaea i te tatamaˈi

Ua papai te hoê tamaroa, 11 matahiti to ˈna, no Kalifonia, i Marite, i te mau Ite no Iehova i Brooklyn, i New York:

“Mea au roa na ˈu ta outou mau buka, te buka ra Te ravea e itehia ˈi te oaoa i te utuafare iho â râ. Na mua ˈˈe i noaa mai ai ia mâua i taua buka ra, e tatamaˈi noa na mâua to ˈu tuahine. I te hoê mahana, ua faaoti aˈera mâua e tuatapapa i taua buka ra, e ua taa ˈtura ia mâua e aita mâua e rave ra i te mea o ta te Atua i hinaaro ia rave mâua.

“Ua tauturu rahi mai teie buka ia mâua. Te mauruuru nei au no te reira, e te faaitoito nei au i te tahi atu mau utuafare ia taio i teie buka no te mea e mea maitai roa oia. Te tauturu atoa ra oia i to ˈu utuafare ia ite i te hau e te oaoa i to matou fare.”

Te hohora ra te buka ra Te ravea e itehia ˈi te oaoa i te utuafare, 192 api, i te mau tumu parau faufaa mai teie “A paruru i to oe utuafare i te mau haafifiraa iino,” “Ia vai te hau i roto i to oe utuafare,” e “E nehenehe e upootia i nia i te mau fifi o te faaino i te utuafare.”

Mai te peu e e hinaaro outou e ia haere mai te hoê taata no te aratai i te hoê haapiiraa Bibilia tamoni ore i to outou fare, a papai atu ïa i te amaa a te Taatiraa “Te mau Ite no Iehova,” B.P. 7715, 98719 Taravao, TAHITI, aore ra i te hoê o te mau vahi nohoraa i te api 5.