“O te buka matamua ïa o ta ˈna i taio aˈenei”

E pinepine te mau Ite no Iehova no Ukraine i te tauaparau e te feia e tiai ra i te pereoo auahi. Ua horoahia na te hoê vahine, o tei anaanatae i te Bibilia, i te buka ra Ta ˈu Buka Aamu Bibilia, o te faaite ra e rave rahi hohoˈa i roto i ta ˈna mau aamu Bibilia ia au i te tuatapaparaa o te tau.

I muri iho, i taua noa vahi tapearaa pereoo auahi ra, ua farerei faahou taua vahine ra i te Ite e ua haamauruuru atura ia ˈna no te buka, ma te faataa e: “Aita ta ˈu tamaiti e au na e haapii i ta ˈna mau buka haapiiraa. Mea varavara roa oia i te taio i taua mau buka ra. Tera râ, i to ˈu horoaraa ˈtu ia ˈna ra i te buka ra Aamu Bibilia, ua mataitai oia i te mau hohoˈa e ua hiaai roa ˈtura oia e taio. Ua taio oia i te buka taatoa i roto e piti hebedoma. O te buka matamua ïa o ta ˈna i taio aˈenei. Te mea faufaa roa ˈtu â râ, ua oaoa oia i te iteraa e o vai te Atua. E te oaoa atoa nei au i te iteraa i teie mau tauiraa i nia ia ˈna. Ia tia ia outou, a horoa faahou mai na i te tahi mea no te taio.”

To pihai iho noa mai te tahi atu vahine, e ua faaroo oia i teie aamu. Ua ani atura oia i te buka ra Ta ˈu Buka Aamu Bibilia. E nehenehe e noaa atoa ia outou i teie buka e 256 api aore ra e nehenehe te hoê taata e haere i to outou fare no te tauaparau no nia i te faufaaraa o te haapiiraa a te Bibilia, na roto i te papairaa ˈtu i te amaa a te Taatiraa “Te mau Ite no Iehova,” B.P. 7715, 98719 Taravao, TAHITI, aore ra i te hoê o te mau vahi nohoraa i te api 5.