Te hoê hiˈoraa te tia ia pee

NA TE PAPAI VEA A A ARA MAI NA! I TIRENI

E fare tahua to Giacomo Castelli i Antofagasta, te hoê oire e tau 170 000 taata i te pae apatoerau no Tireni. I te avaˈe Tiunu i mairi aˈenei, mai to ˈna taupee mai, ua mataitai oia i te hoê pǔpǔ taata i roto i te hoê aua rahi i reira. “Ua maere roa vau i to ˈu iteraa i te mau taurearea i te ataataraa e te hautiraa e to ratou mau metua,” o ta ˈna ïa i papai i roto i te hoê rata i te vea ra El Mercurio. No te ite-papu-raa i teie ohipa maere, ua pou maira oia no te haere i te aua ra.

“Ua maere faahou â vau,” o ta te taata papai uiui ïa i parau. “I te paiaraa te tahi mau utuafare, ua haamata ˈtura te melo tataitahi i te ohi haere i te mau mea i faarue-hape-hia na raro, e ua tuu atura i roto i ta ratou iho mau farii pehu. . . .

“Ua hinaaro atura vau e ite e o vai ma taua mau taata taa ê mau ra,” o ta te taata papai ïa i parau faahou. “Ua ani atura vau i te hoê potii haviti, o te nehenehe hoi e upootia ohie i roto i te mau tataˈuraa purotu, e ua parau maira oia ma te oaoa rahi e: ‘E Ite no Iehova matou, e e rururaa ta matou i te Regional Stadium.’” I te taime faafaaearaa i te avatea, ua haere te tahi mau pǔpǔ mai te rururaa haaati mai, hau atu i te 3 000 taata tei putuputu, i te aua ra no te tamaa.

“E Katolika Aposetolo Roma vau,” o ta te taata papai ïa i parau. “Te haere tamau nei au i te Pureraa moˈa e ua apiti atoa vau i roto i te tere pereninaraa i Lourdes, i Farani, tau matahiti i teie nei.

“Tera râ, no ta ˈu haapiiraa kerisetiano hohonu, e tia ia ˈu ia uiui ma te haavare ore e: Eaha ta ratou, e aita ta tatou, te mau Katolika, te haapaoraa a te rahiraa i Tireni? No te aha e au ra e mea oaoa roa taua mau taurearea ra e to ratou mau metua, area ta ˈu na tamahine e toru ra, eita ratou e au ia ani atoa ˈtu vau ia ratou ia haere matou e ori haere?

“No te aha e mea ino roa ta tatou mau tamarii Katolika; no te aha ratou e tuô ai e e hauti ai i te mau ‘Power Rangers’ ma te tupai i te tahi atu mau tamarii, . . . area taua mau tamarii ra, e mea hau ïa ratou, mea ataata, e mea faatura i te natura? No te aha eita ta tatou, te mau Katolika, e nehenehe e faatupu i te mau rururaa ma te ore e faaô i roto i te ohipa tapihooraa au ore, e haaati ra i ta tatou mau vahi faaroo moˈa roa ˈˈe, mai te mau vahi moˈa ra La Tirana, i Andacollo, e te tahi atu?”

Ua faaoti o Castelli Tane i te rata o ta ˈna i papai i te vea ra ma teie uiraa e: “E riro anei tatou, o te faariro nei ia tatou iho ei Katolika e ei Kerisetiano, mai ia ratou te huru? Ia tauturu mai ïa te Atua e te Paretenia ia tatou ia na reira.”