Hoê tau nehenehe no a muri aˈe no te palaneta Fenua
“TE FAAITE ra te mau maimiraa e o te Fenua te palaneta veavea roa ˈˈe i teie mahana a 600 matahiti i teie nei,” o ta te vea ïa Globe and Mail no Toronto e tapao ra. I te matahiti 1995, i te mau Hau Amui no Marite no ropu, hau atu i te 500 taata tei pohe i Chicago no te veavea rahi. Ua tupu atoa teie huru ohipa i Inidia e i Auteralia, area te fenua Beretane ra, ua faaruru oia i “te toruraa o te tau veavea mǎrô roa ˈˈe a 200 matahiti i teie nei.”
Eaha te tumu? Te parau nei Henry Hengeveld, taata aravihi i te pae ahuaraˈi e te Tuhaa atuatu i te natura a te hau i Kanada e: “Te faaite ra te rahiraa haapapuraa e te itehia ra te mana o te taata i nia i te ahuaraˈi o te fenua taatoa.” Ia au i te maimiraa a te vea ra Globe and Mail “te tuea ra te tauiraa te huru o te mahana i te mau hohoˈa matini roro uira e faatupu ra i te mahanahanaraa o te reva mataˈi, noa ˈtu e o te amaraa o te mau taoˈa ura tahito o te fenua te tumu rahi.”
Te aimârô-noa-hia ra te tupuraa o te mahanahanaraa o te reva mataˈi i rotopu i te mau aivanaa. Teie râ, te faaite nei Te buka parau paari apî beretane e: “Te faaohipa nei te huitaata ma te tano ore i te reva mataˈi e haaati ra vitiviti aˈe i ta ratou e taa ra i te auraa.”
Auaa râ, te parau maira te Bibilia ia tatou e area te fenua nei “te vai noa nei â ïa.” (Koheleta 1:4) No te mea eita te Poiete, te Atua ra o Iehova, e faatia i te taata aore ra i te tahi mau puai natura ia haamou i te fenua. Tera râ, na ˈna e “haamou i te feia e faaino ra i te fenua nei.”—Apokalupo 11:17, 18, MN.
Hau atu â, te haapapu maira te Bibilia e ua faaineine te Atua ra o Iehova i te hoê tau nehenehe no a muri aˈe no to tatou palaneta, te Fenua, e no te feia atoa e auraro. “Area te feia mǎrû ra, e parahi ïa i te fenua, e oaoa ratou i te rahi o te hau ra.” Auê tatou i te oaoa e, tei te Atua ra te tau no a muri aˈe o te fenua nei, aita i te taata ra!—Salamo 37:11; 72:16; Isaia 65:17-25; Petero 2, 3:13.
Mai te peu e e hinaaro outou i te mau vea i mua nei o te A ara mai na!, a papai atu ïa i te amaa a te Taiete Watch Tower, B.P. 7715, 98719 Taravao, TAHITI, aore ra i te hoê o te mau vahi nohoraa i faataahia i te api 5.
[Faaiteraa i te fatu o te hohoˈa i te api 32]
NASA photo