Te faatae nei te mau taurearea i to ratou mauruuru

E MAU taurearea haere haapiiraa tuarua anaˈe no Nigeria tei patahia i nia i teie hohoˈa. I roto i te hoê rata i papaihia i te amaa a te mau Ite no Iehova i Nigeria, ua papai ratou e: “Te hinaaro nei matou e haamauruuru ia outou no to outou haapao-maite-raa ia matou na roto i te neneiraa i te buka ra Questions Young People Ask—Answers That Work.

“Ua tauturu mai teie buka ia matou ia patoi i te mau haavîraa a teie nei ao e ia faahapa ˈtu i te mau haapiiraa tei ore e tano e te mau Papai. Te tuatapapa ra oia e rave rahi mau manaˈo no te mau tapitapiraa a te mau taurearea, e ua niu-noa-hia ta ˈna aˈoraa i nia i te Bibilia. Ua tauturu maite te tuhaa e tuatapapa ra i teie huru haavîraa, ia matou, ia taa i te paari o te Bibilia na roto i ta ˈna aˈoraa ia haere e te feia paari e ia ape i te amuimuiraa e te feia maamaa. Ua maere vetahi taurearea haere haapiiraa i roto i ta matou fare haapiiraa e mea nafea to matou faaoromairaa i te tahi e te tahi i roto i te here e mea nafea to matou imiraa i te haapao maite i te manaˈo tahoê i roto i te taairaa tahoê o te hau.

“Ma te imi i te mau taime atoa i te tapea maite i to matou haerea maitai i rotopu i te mau taurearea haere haapiiraa i ta matou fare haapiiraa, te poro nei matou ma te ieie i te tiaturiraa o te Basileia i te feia haere haapiiraa atoa e faaroo mai ia matou, ma te ore e tâuˈa i te mau taurearea e tamata ra i te faahema ia matou i nia i te eˈa hape.”

Ua tarimahia teie rata, “Na te mau taurearea Ite no Iehova, Fare haapiiraa tuarua All Saints Aba, Fenua Abia, Nigeria.”

Mai te peu e e hinaaro outou i te hoê buka Young People Ask—Answers that work aore ra e hinaaro outou ia haere mai te hoê taata no te aratai i te hoê haapiiraa bibilia tamoni ore i te fare, a papai atu ïa i te amaa a te Taiete Watchtower, B.P. 518, Papeete, Tahiti, aore ra i te hoê o te mau vahi nohoraa i faataahia i te api 5.