“E haafatata te reira ia oe i te Mesia”

TEIE te parau a te rahiraa no nia i te buka tei neneihia e ere i te mea maoro e te mau Ite no Iehova, Te taata rahi roa ˈˈe i ora aˈenei. Ua tapao te hoê vahine no te fenua Farani e: “Noa ˈtu e e mea au roa na ˈu te mau buka a te Taiete Watch Tower, aitâ hoê buka i haaputapû ia ˈu mai te reira te huru.” I roto i te hoê rata ta ˈna i faatae i te Amaa no Farani, te faataa ra oia e:

“I teie tuatapaparaa maramarama maitai no nia i te Mesia ua hau atu vau i te here i to ˈna huru maitai roa. Ua ite-atoa-hia ia ˈu te mau tuhaa faufaa o to ˈna oraraa, noa ˈtu e ua taio aˈena vau i te Evanelia e rave rahi taime. I te roaraa o te mau api o teie buka, te ite ra tatou i te mau taime faufaa, ta te Mesia i ora na, ma te fafa i te aroha e te mǎrû, te mǎtaˈu ore e to ˈna huru fati ore atoa.

“E putapû roa oe i te mau pene hopea. Ua tae roa vau i te ore e nehenehe faahou e tapea i to ˈu roimata i te iteraa e ua farii ma te aau tae te mea poietehia faufaa roa ˈˈe i te ao taatoa nei ia haamauiuihia o ˈna e te mau tavini viivii a te Diabolo. Auê ïa hiˈoraa mana rahi e! E tia ia ˈu ia parau e i teie nei e mea fatata roa ˈˈe au i to tatou ‘Metua no te ui a muri atu,’ oia hoi to tatou Arii e faatere mau ra.”—Isaia 9:6.

Te mau Ite no Iehova, e faanahonahoraa hau atu i te maha mirioni feia haapii Bibilia no te mau nunaa atoa, e te tiaturi ra te taatoa e ere noa Iesu Mesia i te taata rahi roa ˈˈe i ora aˈenei, o te ravea hoê roa atoa râ teie e noaa ai i te taata nei te ora mure ore.—Ohipa 4:12.

Mai te peu e e hinaaro outou i te tahi mau haamaramaramaraa hau atu aore ra i te hoê haapiiraa bibilia tamoni ore i to outou fare, a papai mai i te amaa a te Taiete Watchtower, B.P. 518, Papeete, TAHITI, aore ra i te hoê o te mau vahi nohoraa i faataahia i te api 5.