Te pape o te haapohe

UA HIˈOPOA te feia maimi tonohia e te tavana oire no te Haapiiraa tuatoru a te Hau no San Marcos i Peru, e 30 tuhaa pape no roto i te mau faataheraa pape huiraatira e to te mau nohoraa no te oire no Lima. Ia au i te vea latino-marite ra Visión, e 29 tuhaa pape ua viivii-roa-hia ïa i te mau bateria e i te para. Hoê noa tuhaa pape e tano no te inu.

Ua faaoti te faatere hau no te pae oraora-maitai-raa o te tino no Peru e 50 i nia i te hanere o te pape e inuhia ra e te taata no Lima e horoa ïa i “te hi, te fiva aau, te maˈi o te upaa, e te tahi atu â mau maˈi aau.” Ua tui te roo o te maˈi pee hi toto tei parare i Peru, e ua peehia fatata e 150 000 taata ma te haapohe e 1 100 taata mai te avaˈe tenuare e tae atu i te avaˈe eperera no te matahiti 1991.

Te ravea e faaitoito-rahi-hia ra no te arai i te fifi o te haapihaa-maoro-raa ïa i te pape no te tinai i te mau manumanu maˈi. E ere hoi teie i te mea ohie atoa. Te tapao ra te vea ra Visión e no te “utuafare e rave rahi mea moni rahi roa te haapihaaraa i te pape e ahuru minuti no te mea ua hau atu i te hoê dala marite fatata maha litera mori arahu,” o te moni e aufauhia ra i te hebedoma no te ohipa a te rahiraa o te taata.

Aita e ite-noa-hia ra teie fifi o te pape inu viivii i roto i te mau fenua veve roa. Ei hiˈoraa, ia au i The New York Times, i te Fenua Marite, “ua manaˈohia i te matahiti taitahi ua hau atu i te 250000 tamarii te nehenehe e inu i te pape viivii ravai maitai no te faaino i to ratou tupu-maitai-raa i te pae o te feruriraa e to te pae tino atoa.” E i Europa te vai ra te haapeapearaa rahi no nia i te viiviiraa te mau taheraa pape. Te faataa ra te vea New Scientist e “no ô mai te rahiraa o te pape no Europa i te mau auri pape, o tei viiviihia ma te ati mau i te mau taoˈa auri taero.”

I roto i te Apokalupo 14:7, te faahiti ra te Bibilia i te parau no Iehova “tei hamani i te raˈi, e te fenua, e te tai, e te mau pape pihaa ra.” E mana atoa to ˈna no te taui i te pape maramara e te viivii ei pape maaro e te mâ. (Exodo 15:22-25; Mau Arii 2, 2:19-22) O ta ˈna ïa e rave i te fenua taatoa nei ma te haamou i te feia e faaino nei i te fenua.—Apokalupo 11:18.