“A ara, to te ao!”

NA ROTO i teie upoo parau maere o te api parau matamua, o te haamataraa ïa o te A ara mai na!, i te 22 no atete i te matahiti 1946. Te haapararehia ra ïa iti aˈe i te 500 000 i te numera taitahi na roto ahuru reo. I teie nei mahana, ua hau atu i te 13 mirioni te neneihia ra na roto 67 reo. No te aha teie vea i neneihia i te haamataraa? Mea nafea te opuaraahia no te tauturu ia oe, te taata taio, i roto i to oe oraraa i te mau mahana atoa?

Ua mono te A ara mai na! i te vea ra Tamahanahanaraa (1937) e to mua ˈtu ia ˈna, Te tau auro (1919). No te aha ua manaˈo-matamua-hia e Te tau auro e mea faufaa ïa no te apiti atu i te vea ra Te Pare Tiairaa a 73 matahiti i teie nei?

Ua faˈi te numera matamua o Te tau auro, no te 1 no atopa 1919, e: “Tei roto te mau nunaa i te ahoaho i te pae politita, i te pae faanavairaa faufaa e te pae totiare atoa. Te itehia ra te mau fifi i te mau mahana atoa, e no te faatitiaifaro i te reira e au ra e e puai hau aˈe i to te aravihi o te taata te titauhia.” Teie te tahi atu manaˈo no taua tau ra: “I te mau vahi atoa te maraa noa ˈtura te moni hoo e te hiaairaa i te mau mea hinaarohia e te oˈe, e i mua i te reira ua araara ïa te mata o te taata e rave rahi.” Ma te maere mau, aita ra anei tatou e faaruru nei i te hoê â huru tupuraa i teie nei mahana?

Te faaite nei te feia nenei i te A ara mai na!, ma te hutiraa i te ara-maite-raa i nia i te mau fifi e tae ra i nia i teie nei ao, i te ravea hoê roa e te parau mau— oia hoi te faatereraa parau-tia i nia i te huitaata nei na roto i te faatereraa o te Basileia o te Atua i te rima o Iesu Mesia tei faatia-faahou-hia. Te tohu ra te mau Papai hebera e te mau Papai heleni kerisetiano no te tau i reira e itehia ˈi “te raˈi apî e te fenua apî,” oia ïa, te hoê faatereraa apî i te pae varua i nia i te hoê totaiete taata apî i nia i te fenua nei. (Isaia 65:17; Petero 2, 3:13; Apokalupo 21:1-4) Ma te tuatapapa i te mau tupuraa o te ao nei e te mau ohipa no te pae o te ite, te tamau noa nei A ara mai na! i te huti i te ara-maite-raa i nia i te ravea a te Atua no te faaore i te mauiui o te huitaata nei. I te tuhaa rahi, te tauturu ra ïa i te feia taio ia faaruru ratou i te mau peapea o te oraraa o te mahana taitahi.

I rotopu i te tahi atu mau mea, e haamâmâ A ara mai na! i te feia e ahoaho rahi to ratou e o tei haavihia e te amuiraa o te mau mea a Satani o ta tatou e ora nei. E nehenehe mau ïa tatou e parau, mai teie numera o te matahiti 1946 e: “Teie ïa te vea faufaa roa ˈˈe i te pae no te haapiiraa no te feia aau tae mau e te parau-tia no te mau iri atoa, no te mau opu atoa e te mau nunaa atoa.” Ahiri e e hinaaro oe i te mau haamaramaramaraa hau atu no nia i teie nei vea, a haere ïa e farerei i te hoê Ite no Iehova i te Piha no te Basileia i to oe vahi aore ra a papai i te feia nenei i teie vea. A hiˈo i te api 5 no te mau haamaramaramaraa.