Ohipa oaoa i te fenua Rusia

E TANO roa ia oaoa teie tamahine iti no Lvov. Tei roto o ˈna i te mau 74 252 taata o tei putuputu ma te tiamâ i te fenua Rusia no te fanaˈo i te hoê tairururaa kerisetiano e teie buka apî nehenehe roa na roto i te reo rusia, oia hoi Te taata rahi roa ˈˈe i ora aˈenei. Noa ˈtu e aita te mau Ite no Iehova i faatiahia na mua ˈˈe ia faatupu i te mau tairururaa i te fenua Rusia, ua faanaho ratou e hitu tairururaa i te tau veavea i mairi aˈenei.

Ua faatupuhia te hoê o te mau tairururaa i te oire no Alma-Ata, i Kazakhstan, e ua haere atoa mai te feia tairuru no te mau Repubilita no Rusia, oia hoi Uzbekistan, Kirghizia, Tadzhikistan, e Turkmenistan. I Alma-Ata, hau atu i te 6 000 taata o tei oaoa i te noaaraa mai te buka apî. I te opereraahia te buka tamoni ore na te nahoa tei hau atu i te 4 000 taata tei ruru i Usolye-Sibirskoye, i Siberia, ua faaite te faatere o te tahua e: “E semeio teie!”

I Kiev, i to te mau mutoi e te feia tupohe auahi iteraa i te buka, ua ani ratou i te tahi na ratou, i te na ôraa e: “Na matou hoi i paruru ia outou; ua tae atoa ˈtu matou i te tairururaa.” Ua ani te hoê raatira mutoi e, “Ihea roa teie buka i te neneiraahia? Ehia rahiraa buka o tei neneihia?”

E tae roa mai i teie nei, hau atu i te 12 mirioni buka o tei neneihia na roto i tau 60 reo, e tae noa ˈtu, te mau reo matau-ore-hia oia hoi Bislama, Efịk, Ewe, Ga, Igbo, Rarotoa, Sepedi, Shona, Tsonga, Tswana, Twi, e Venda.

E mau mirioni taata na te ara o te oaoa nei i te taioraa i teie buka apî e 448 api no nia i te oraraa e te taviniraa a Iesu Mesia. Mai te peu e te hinaaro ra outou i te mau haamaramaramaraa no nia ia Iesu e to ˈna tiaraa i roto i te faatupuraa i te opuaraa a te Atua no te fenua nei, a papai atu i te amaa a te taatiraa Te mau Ite no Iehova, B.P. 518, Papeete, TAHITI, aore ra i te hoê o te mau vahi nohoraa i faataahia i te api 5.