Aramoina ihora te mau moemoeâ no te hau

MEA iti roa te feia o tei manaˈo e e riro o 1914 ei matahiti taa ê roa. Inaha, e au ra e mea faahiahia roa te tau a muri aˈe ia hiˈohia i te mau matahiti na mua ˈtu. Ua haere te ite aivanaa i mua no te aro i te mau maˈi. E te tamaˈi? Mai ta te vea a te Vaticana L’Osservatore Romano i faataa i te avaˈe febuare 1991, na mua ˈtu i te matahiti 1914 “ua tiaturi [te huiraatira] e ua moe-roa-hia te tamaˈi i roto i te aamu tahito” e te tomo atura te taata i roto i “te hoê anotau i reira ua faaore roa te mau nunaa e te mau faatereraa maramarama i te tamaˈi.”

Teie râ, ua faaherehere te matahiti 1914 e to muri iho i te mau ati ta te huitaata tei mauruuru roa e ore e tiaturi ra. Te ati matamua, o te Tamaˈi Rahi no 1914-1918 o tei vavahi roa i te mau moemoeâ no te hau. Te faahiti ra te vea L’Osservatore Romano ia ˈna mai “te taparahiraa taata matamua rahi o te aamu o te tau apî, tei tapaohia, i rotopu i te tahi atu mau mea, e te mau ravea aravihi apî ta te mau aivanaa rahi no te mau ui na mua ˈtu i tiaturi e e faaohipahia no te faatupu i te hau.” Ua riro hoi te tamaˈi ei faaoooraa i te ite aivanaa o tei faarirohia na hoi ei mauhaa no te hau; inaha hoi, ua horoa ˈtu te ite aivanaa na te tamaˈi i te hoê puai taparahi taata faito ore.

I te hoperaa taua tamaˈi taparahi taata ra, ua haamata ihora te tahi atu ati. Ua haapohe te fiva paniora o te matahiti 1918-1919 hau atu i te 20 mirioni taata—hau atu i te numera riaria o te feia i pohe i roto i te Tamaˈi rahi iho. Ua ravehia ˈtura te mau faanahoraa etaeta roa; ua faarirohia te haaparareraa i te maˈi ei ohipa taparahi taata i roto i te tahi mau fenua. Ua tae roa te mau mutoi i te haru i te feia o tei maitihe i mua i te taata! Aita râ e faufaa. Mai te hoê vero ra te huru, ua tairi te maˈi i te taata ma te mâha ore e tae roa ˈtu i te taime a faaea ˈi oia. Ua tumâ-roa-hia te mau oire taatoa. Ua apapa-noa-hia te mau tino pohe i roto i te mau fare vairaa taata pohe.

Ua atutu roa te huitaata nei i te anotau tauiraa rahi i haamata i te matahiti 1914. Ua huˈahuˈa roa hoi ta ˈna mau tiaturiraa e ua manuïa oia i nia i te tamaˈi e te maˈi, ta ˈna mau moemoeâ no te hau o te ao nei maoti te paari taata nei. E a ino noa ˈi te mau ohipa, ua riro mai nei te Tamaˈi Rahi ei Tamaˈi Rahi matamua, maoti te ati riaria tei mono mai ia ˈna, te Piti o te Tamaˈi Rahi, a tamau noa ˈi te maˈi, te veve, te poia, e te ohipa tia ore i te parare mai te maˈi pee ra te huru na te ao atoa nei, ua taa ˈtura i te feia tuatapapa aamu e ua riro o 1914 ei tipuuraa i roto i te aamu o te taata.

Taa ê râ i te paeau rahi o te ao nei, ua tiaturi te Feia Haapii i te Bibilia (te iˈoa tahito o te mau Ite no Iehova) e e riro o 1914 ei matahiti tapaohia hou oia e tae mai ai. E i te mau matahiti i muri iho, aita te mau Ite no Iehova i maere i te iteraa i te ao nei i te toparaa i roto i te ati o teie mahana. Ua tauturu te mau parau tohu a te Bibilia ia ratou ia tiai i teie mau tupuraa e ia ite i te tau hanahana i muri iho. Nafea ïa? A ani atu ïa i te mau Ite no Iehova ia haere mai ratou i ǒ outou. Aore ra a papai atu i te feia nenei o teie vea.

[Faaiteraa i te fatu o te hohoˈa i te api 32]

Ia au i te hoê ohipa a Franklin Booth